【wONdEr|樓.搜】月入15萬中產家庭之苦

更新時間 (HKT): 2018.07.16 15:00

娥特前排出果6招,自己都講明無助壓抑樓價,有中產覺得全面被政府遺棄,的確係可悲事實。就算機會幾渺茫,都仲有幾千個減價新居屋、綠置居、首置上車盤,畀啲黎民百姓爭吓。娥特仲話考慮調整公私樓比例,又撥多幾幅地起資助房屋,出心出力安撫幾十萬申請人,可憐中產就焗買或租私樓,真係佛都有火。

話說有個無樓四口中產家庭,兩公婆係公務員月入15萬!15萬喎,好好洗喇?兩公婆仲好樸素,又唔買名牌無飲靚酒,儲埋儲埋肯定大把錢!咪住先~ 睇埋每個月條數點計先講:一家連工人租黃埔三房承惠2.5萬、工人水電煤買餸雜費1.5萬、仔女直資小學學費連文武興趣班加補習3萬、養架見得人七人車1萬、供教育基金連保險1萬、兩邊父母家用1.5萬、MPF 3千、暑假聖誕兩轉旅行拉勻1萬、扣晒免稅額交稅拉勻1.2萬,都唔好講小朋友唔舒服睇醫生果啲突發開支,兩公婆每月淨返2萬蚊零用,一人一萬,畀班唔生性下屬屈吓請食Tea唔見一千銀,真係赤到落骨罅。

「吓!2.5萬租層樓?供都供得到喇!」你又啱喎,佢住緊果隻黃埔3房而家賣緊千二萬啫,做一半按揭分三十年供,計埋管理費都係同租金打個和,但首先佢哋要有600萬首期,假設佢兩公婆每人只洗5千儲1萬,無咩突發嘢嘅話,過多幾十年就儲到600萬,有機會做業主喇~ yeah!不過到時都果頭近,仲買咩樓唧?買定棺材龕位罷喇!諗諗吓,扣埋啲基本開支,其實佢兩公婆做到隻屐咁,但每個月自己都得幾千蚊洗,分分鐘差過畢業兩年搵萬五蚊、痴住爸媽住嘅獨男。中產係搵得多但亦洗得大,有份落力促進經濟,但偏偏政策上一啲幫助都無,真係難怪佢哋含住一泡怨氣。

一格照片,一個故事,Follow蘋果Instagram!
BannerBanner