《黑》到爆:黑社會之紋身 現代蠱惑仔興紋耶穌

更新時間 (HKT): 2006.04.29 08:00

潮人紋身好Casual,我知,但行蠱惑必左青龍右白虎這觀念太根深柢固,腦海中的紋身店更是陰森昏暗,想不到受訪問的「藝之繪」師傅高佬態度友善,身為紋身師傅的他全身竟無一個紋身,還說:「𠵱家啲蠱惑仔紋身都紋得好潮,唔龍唔鳳反而會紋耶穌上身!」

記者:曾冠輝、許維雅 攝影:黃子偉、楊錦文

師傅:唔係個個部位都紋!

「藝之繪」紋身師傅高佬入行20年,見證香港紋身潮流轉變:「八九十年代最多出嚟行嘅蠱惑仔紋身,紋嘅多數龍虎鳳呢類猛獸,貪威猛夠煞氣吖嘛,紋嘅地方多數係心口、手臂、膊頭,慌死人睇唔到嗰隻,紋得觀音嘅就梗係想保平安,甚至紋鍾馗嘅都大有人在。」現在呢?反而少真正蠱惑仔紋身,潮人明星卻人人少不了一個紋身,「𠵱家已經好少蠱惑仔紋身,就算紋都紋得好潮,荊棘圖案就最大路,呢期有蠱惑仔想出位,仲紋耶穌上身㖭呀!紋嘅地方亦唔只係背脊、手臂,連手指手背都會紋,不過我自己就唔會幫人紋面,怕佢將來後悔嚟搵我;其他好似喉嚨等重要部位我都唔會紋,太危險啦。」翻着大本大本的紋身圖案冊,花多眼亂,真的由耶穌到哲古華拉等人像圖案都有。

志雄:手臂紋滿屋企人!

現在的蠱惑仔紋耶穌,過來人志雄卻滿身傳統龍與鳳,未訪問,第一時間被他雙臂吸引,忍不住問:「其實你啲紋身有無意思㗎?」他說:「我右前臂本身有個一條龍俾刀插到流晒血嘅紋身,後生年少氣盛,諗住話畀人聽我狼到連龍都夠膽殺。後嚟識咗好多叫乜龍物龍嘅江湖人,咁多人叫阿龍咯,仲有條龍喺手臂唔係咁好,咪紋個孔雀冚住佢囉,右上臂就有隻鷹,後來手臂愈嚟愈粗,所以又走去日本紋啲圖案喺側邊。而左手全隻手臂紋嘅都係屋企人,有Father、Mother,上臂仲有太太同仔女個名。」嘩,好溫情洋溢。

主編:多用荊棘圖案!

現代蠱惑仔少紋身,但江湖漫畫卻十年不變,幾乎個個主角都有紋身,《古惑仔》編輯JackyMan話:「我哋都會上網參考外國紋身圖案,睇吓潮流興乜圖案先加落公仔度,希望唔會Out兼配合到實情喇,舊角色主要紋龍紋鷹,新角色多數紋荊棘圖案。不過畫公仔還畫公仔,讀者來信索取紋身圖案,照畀,但我哋唔鼓勵人紋身,第時後悔就無謂喇。」

新舊紋身比拼

紋身以猛獸為主,紋者多為江湖人士,藉身上猛獸顯示自己氣勢。

款式多樣,圖案以線條為主,從字款到人像等圖案都有。

買張印水紙

想玩紋身又唔夠決心?可以試吓印水紙吖,款式一樣多到你有排揀!女人街有售,每張$10,抵玩。

麥玲玲:唔紋好過紋!

紋身可改運?非也!從玄學角度看,紋身等同破相,堪輿學家麥玲玲說:「紋錯部位對運程會有負面影響,張栢芝紋腳踝就破壞咗事業運。」紋身與身上的墨一樣,膊頭有墨代表辛苦命,手腕腳踝有墨會影響事業運,「傳統龍虎鳳圖案會增加個人戾氣,有損人和,咪紋!觀音等神明一樣,神明係用嚟供奉嘅,紋上身對神明不敬盞得惡果,都咪紋!我建議要紋都紋喺背脊同腰間,影響最少,又或者選擇一啲旺自己嘅顏色,揀祥和圖案,減低紋身對自身嘅影響。」

街訪

以前一見左青龍右白虎就知係蠱惑仔,𠵱家啲人又點睇紋身呢?

果然好玩 籽在四方,即like「果籽」FB專頁!
BannerBanner