潮流文化1:
潮網六宗罪乜都抄

更新時間 (HKT): 2009.03.09 06:00

很多人都說歐美經過這一輪金融洗劫之後變成無牙老虎,中國這隻沉睡的獅子開始醒了。說中國是本世紀強國之一,我信呀!除了經濟夠強,就連抄襲能力和老翻製作都一樣咁堅,繼miniiPhone、簡體字iPodnano等等老翻當正貨賣,家陣連網頁都死跟,抄足外國正版貨,外形與用法都一樣;即使港台電視劇集都被網民老翻放上網任睇,完全漠視知識版權。學栢芝話齋:錯就要認,打就企定,即數強國子民犯的六宗罪!

記者:葉雪芯
攝影:黃子偉
Model:Wing@puremodel

一宗罪
翻版Facebook縱橫大陸

數到全球最強勁的社交網一定是Facebook。04年由幾個美國讀緊大學嘅𡃁仔設計,現已為他們賺取數以億計的收入,咁大嚿肥豬肉點會唔俾國內強人翻一翻再賺番筆。在大陸旋即有幾個社交網絡竄紅,最強勁莫過於「校內網」,不過一睇個網頁設計……撞鬼!不論是顏色還是用法都幾乎與Facebook一模一樣!似得咁交關,會唔會被Facebook控告抄襲就暫時未知,不過卻已肯定廣受大陸網民支持,現時註冊用戶已超過4,000萬,連冧盡倪才子的「神奇的A茆茆」張茆都有開A/C,強國有十幾億人口,睇嚟未來後勁非常凌厲,絕對能成Facebook對手!

二宗罪
史上最強搜尋引擎?

再次不得不佩服強國IT人才的「創意」,說的是被一眾網民形容為「史上最強的搜尋引擎」──Baigoohoo,中文叫做「百谷虎」,單睇個名唔知係乜東東,打開個網址即明白原來係將大陸最大的搜尋引擎百度、國際搜尋引擎老大哥Google和Yahoo!的三合一!隨便打個字去Search睇睇有幾巴閉……唓,其實只是將介面劏開三欄分別到以上的三大網址搜尋,完全是「假手於人」。好笑在後頭,「百度」之後仲有個「千度」搜尋網,真識搞Gag。

三宗罪
淘寶網都有老翻?

人稱「大陸版eBay」的購物網「淘寶網」早有大陸幾億人口作後盾,近年更吸引不少港人落場搵錢搵貨。不同於外國購物網以信用卡或Paypal付款,淘寶網有自家的一套付款模式,就是支付寶,安全程度比得上Paypal。最近就有一個自稱「淘寶山寨版」──「潤購網」的購物網彈起,主攻女性市場,短短半年不到的時間成交額突破4,534萬。不過「潤購網」排版比較簡陋,貨物量亦比淘寶少一半有多,大部份賣家都非常新手,身處香港又驚有風險的網民,都係諗清楚咪亂幫襯!

四宗罪
港、台電視新鮮任睇

有網民就完全漠視知識版權,將香港、台灣的電視節目放上網任睇!台灣的綜藝節目可以在YouTube睇到,仲要係即日更新,幾乎好似喺台灣同步收看一樣。港人最愛看的《康熙來了》、《王牌大賤諜》、《超級星光大道》等通通可以在YouTube找到,仲要整個Playlist順序連續睇,Upload網民所在地多是東南亞如新加坡、馬來西亞等。至於香港的電視劇集亦同樣做即日更新,甚至快過香港播出,例如早前《家好月圓》的結局就率先被網民放上網任睇。

五宗罪
偽基百科專業惡搞

相信不少學生哥平時做功課寫Paper,都會參考網上的百科全書——維基,在網絡世界就有個「偽基」,專門記錄網絡上的大小事件,稱為「網絡大典」。各大的網上事件簿如巴士阿叔、機場阿嬸、淫照事件,通通在大典上有紀錄來龍去脈,一些出位的網民事迹、網上潮語都可以在此搵解釋,與維基一樣,都係可由網民編輯。打開網頁,左上角寫明「偽基百科——惡搞的百科全書」,哦,明晒。

偽基百科: http://uncyclopedia.hk

六宗罪
抄到足MSN的阿里旺旺

大陸早有個QQ抄足ICQ,今次又有新作。強國又一力作就係一個名叫阿里旺旺的InstantMessenger,亦是阿里巴巴旗下產物。一睇外表,明眼人都知係MSN的Copycat,顏色用法與MSN一樣,更與淘寶網掛鈎,用戶可以在阿里旺旺與賣家聊天㖭!唔知今勻財雄勢大Microsoft又會唔會啞忍呢?

阿里旺旺: http://alitalk.alibaba.com.cn

網民反應

我有見過大陸版嘅Facebook,但係我覺得抄得好離譜,而且製作都不及Facebook精美。

我有上大陸嘅網頁睇電視劇集,唔知道原來係侵權喎!其實上網都係靠大家自律,網絡根本好難有一個完善嘅監管。

大陸不嬲都有好多呢啲山寨網,平時都唔會上,因為始終唔及正貨好用,而且大陸網太多廣告和病毒,有啲怕怕。

其實大家得啖笑咪算囉,好似Baigooho呢類山寨搜尋器,大陸一向有好多,但都唔實用,睇完就算。

阿里旺旺幾搞笑喎!QQ我都有試過用,不過好多網頁同埋軟件都係for國內同胞自己用,我哋唔明白佢哋嘅網絡文化。

果然好玩 籽在四方,即like「果籽」FB專頁!
BannerBanner