非常人:因靚聲變奸

更新時間 (HKT): 2012.11.15 05:20

鄭子誠1997年加入《真情》,飾演拋妻棄子的李子浩,自此變成幕前奸人;十五年後的今天,乖仔無市場,香港已成妖獸都市,網民轉在網絡宣洩怨氣,自製九輯《音樂情人鄭子誠做衰嘢合集》,高登巴打接力改圖,連盧海鵬扮畢比特宣傳舞台劇都要加句:「有陰謀嘅係鄭子誠!」追本溯源,成奸之路全由一把靚聲而起。

撰文:蔡俊業

攝影:蔡家輝、部份圖片由受訪者提供

創立時裝品牌

為鍾鎮濤發瘋

開咪寫論文照稿讀

無陰謀只想播歌

在《城市追擊》的半年,鄭子誠至今仍難以忘懷,「本來諗住坐廠,點知要同娛記跑新聞,一個三十幾歲嘅麻甩佬,永遠係最落後嗰個。」他受不了問低級問題,「收風話夏蕙姨攞飯盒畀祥嫂食,我職責就係問佢:『乜嚟㗎?』一睇就知道係飯盒啦,『唔該打開個飯盒畀我睇睇!』其實我問唔出口,但受人二分四嘛。」意興闌珊,他知道再這樣做下去會比死更難受。又某日,他突然收到《真情》監製徐遇安電話,游說他試鏡,就這樣,香港電視史上從此多了一個經典奸人李子浩,「對住曾江、黎宣、關海山、劉丹、司棋姐演戲,全部都係資深演員,我當時太新,點記對白、點走位、點唔拖累呢班資深演員,諗番轉頭就覺得做《真情》好正。」

鄭子誠的真身,是訪問時吃百力滋、遇到笑位會響亮大笑的四十九歲阿叔,平易近人,毫無奸味。為何高登巴打會覺得他奸?指他做任何事也充滿陰謀?甚至封他做「陰謀誠」?輪廓固然是原因,他只消瞇瞇眼皺皺眉便有奸狡效果,「由細到大,屋企人、朋友都話我乖仔,我真係乖仔喎,唔係反叛青年,從來無諗過自己奸,係徐遇安第一個話我『眉宇間帶點奸意』。」或許,與他的招牌低沉聲線也有關,有聽過他順應網民要求,在上星期港台節目《Gimme 5》演繹高登潮文《豆腐火腩飯》嗎?真是感性中帶點陰謀。現時他當《音樂情人》節目主持人,主打八九十年代廣東歌和國語歌,逢周五更會重溫昔日《中文歌曲龍虎榜》十強,上月中,他開咪回應「鄭子誠現象」:「做《音樂情人》呢個節目宗旨好簡單,無陰謀㗎,淨係想播歌。」是的,香港群魔亂舞,有陰謀的都在政總、立法會和中聯辦,絕對不在這齷齪的直播室。

果然好玩 籽在四方,即like「果籽」FB專頁!
BannerBanner