【港女衣學】四招襯衛衣 撇甩校園味

更新時間 (HKT): 2017.01.01 05:20
着衛衣唔一定同「求其」畫上等號,試試以下襯法,想保暖又型格有幾難?(網上圖片)

天氣忽冷忽熱,真係唔知着咩衫先適合。見身邊好友乾脆懶懶地「半放棄」是但笠件衛衣上身就算,好聽就話係校園風,事實卻似落街跑完步未執好個look。其實着衛衣又唔一定同「求其」畫上等號,一於試試以下襯法,想保暖又型格有幾難?

一、襯長褸添層次感

着衛衣俾人感覺hea爆,全因單一件着上身冇層次感兼遮晒身體線條,望上去累贅又冇精神,外襯多件長褸就可以即時有返陣型味,或者學學英模Alexa Chung(圖中),中間搭多件軍綠army shirt就更有層次感。

二、襯皮褸騷線條

無論你係玲瓏浮凸者抑或福態盡現,着上衛衣後身體線條都會被淹沒,想見返腰線?簡簡單單襯件修身皮褸就可以令線條更明顯,選擇短身皮褸款更可以喺視覺上令雙腳更長,比例更好。

三、內搭半截裙變更好比例

各位東方女生身高不一,身型偏向嬌小嘅絲打除咗可以借助高跟鞋,露腿亦可以令人望落更高,學身高1米7嘅Rihanna內搭短蕾絲裙,露出些少蕾絲加大腿,微微性感又不失型格;唔鍾意展露太多肌膚的話,着件長至大腿中央嘅衛衣加過膝裙,露出部份小腿,視覺上亦會更高佻。

四、下身配搭不同材質更搶眼

除咗slogan吸睛,要令人眼前一亮亦可以靠下半身配搭,將衛衣tuck in鮮艷顏色皮裙或者不規則下擺短裙,騷返明顯腰線之餘,悶板衛衣outfit都即時活潑晒。

果然好玩 籽在四方,即like「果籽」FB專頁!
BannerBanner