求驗客手記:
巴利輸波 美斯傷出
左腳王遭殃

更新時間 (HKT): 2013.09.30 05:20

馬體會開季7連勝

肥安下半場即刻派巴利上陣,巴利亦首度喺巴拿比奴球場落場,仲司職右翼鋒;其實擅長左腳嘅巴利,上季喺熱刺都不時串演右翼,推埋大位勁射呢招,仲幫球隊拎到唔少救命3分,但今次如意算盤打唔響,兩次射門1次中目標,但就畀馬體會門將泰拔高圖爾斯救出,加上C朗、艾華路莫拉達等連番失機,皇馬未能追和,以0:1見負,今季不敗身被打破,亦都係1999年以嚟,首次主場輸畀馬體會。皇馬教練出名難撈,賽後主隊球迷發出大量噓聲,肥安就話:「呢兩場我哋都打得唔好,唔夠專注,一定要改善,𠵱家差巴塞同馬體會5分,好彩聯賽仲有好長嘅路。」

馬體會開季就威水,殺低皇馬取得7連勝,同佢一齊咁威,就有巴塞;巴塞上周六作客艾美利亞,由美斯同艾迪安奴各建一功,以2:0贏波,創球會紀錄開季7連勝。不過「左腳球王」美斯踢到28分鐘,因為左腳大腿肌肉受傷退下火線,由沙維入替。球會就係官方網頁表示,隊醫周日為美斯作詳細檢查,確定需缺陣2至3星期,周二作客些路迪嘅歐聯就肯定缺陣。美斯今季已經喺各項比賽幫巴塞入11球,睇嚟巴西前鋒尼馬要孭重飛嘞。

包羅萬有,「體」得舒服,即Like「蘋果體育」FB專頁!
BannerBanner