【翻舊賬】舒尼達連:雲高爾令我變機械人

更新時間 (HKT): 2017.04.10 02:15
已改投愛華頓的舒尼達連(左)對前曼聯領隊雲高爾頗有微言。

踢緊愛華頓嘅前曼聯中場舒尼達連話,前紅魔主帥雲高爾給予球員嘅自由度太低,乜都限死晒,搞到佢踢到好似機械人咁,冇晒信心。

27歲嘅舒尼達連接受法國《隊報》訪問,回憶喺紅魔嘅歲月,佢話:「第一年同雲高爾合作嘅感覺令人難受。我喺場上完全搵唔到滿足感,佢限死我,令我喺比賽得好少自由,就算我已經好有英超經驗,佢都要對我咁做。喺雲高爾麾下,我覺得自己係個機械人。佢哋會吩咐我,千祈唔好走去球場某一部份要波,千祈唔好咁做;呢啲指示困擾住我。」喺雲高爾麾下,整隊曼聯都踢到好慢,好少一腳傳波;或者舒尼達連可以解釋到呢種情況,「當球員喺比賽時,不斷諗『其實教練想我喺呢個情況度做啲咩呢?』,效率就自然下降。尤其曼聯咁大間球會,我哋所有比賽同事無大小都有傳媒報道,令到球隊好快就被批評。」舒尼達連喺2015年由修咸頓轉投曼聯,但喺今年初離開紅魔,加盟愛華頓。

包羅萬有,「體」得舒服,即Like「蘋果體育」FB專頁!
BannerBanner