領航車「誤入歧途」 威尼斯馬拉松爆大冷

更新時間 (HKT): 2017.10.24 06:47

日前喺意大利「水都」威尼斯舉行嘅馬拉松比賽,出現咗離奇嘅一幕。六位本來領先緊嘅跑手,多得領航嘅電單車帶錯路,結果浪費咗時間,最後威尼斯馬拉松畀一位不知名嘅當地跑手贏咗個冠軍。

根據報道,負責領航嘅電單車手因為帶錯路,將六位本來lead緊嘅跑手,由封咗路嘅賽道帶咗上一條有其他車行緊嘅路段。幾位嚟自肯雅同埃塞俄比亞嘅跑手跑多咗幾百米之後,負責領航嘅電單車手先至「如夢初醒」,嗌停班跑手齊齊U-Turn。呢批原本領先緊嘅跑手,因為咁而損失差唔多兩分鐘嘅寶貴時間,但比賽當時已經跑咗25公里有多,最後佢哋都係追唔返一直落後,但係無俾人fake去跑錯路嘅當地跑手Eyob Faniel。

查實Eyob Faniel一直落後成一分鐘咁多,不過佢因為無跑冤枉路,收復失地再贏埋冠軍,成為威尼斯馬拉松22年嚟第一位意大利冠軍跑手,時間係2個鐘頭12分16秒。

包羅萬有,「體」得舒服,即Like「蘋果體育」FB專頁!
BannerBanner