求驗客手記:五對英超隊全部贏盤
神奇布城僅負藍月

更新時間 (HKT): 2018.01.11 05:20

曼迷對布里斯托城有冇印象?佢哋喺上月英聯盃八強爆冷踢走曼聯,到周二英聯盃四強首回合對住另一支曼市球隊,英超榜首曼城幾乎又上演好戲。

曼城主場出擊先失波,最後靠阿古路完場前入波以2:1反勝布城,連哥帥賽後都對呢支英冠球隊讚不絕口。僅負藍月,原來係布城喺今屆英聯盃連續第五場比賽對英超球隊,全部都贏盤認真犀利(見附表)。

史東斯送禮輸12碼

盃仔事小升班事大

布城今季英聯盃殺到入四強可以話係超額完成,佢哋由第二圈起到今場,連續五圈對手都係英超球隊,結果所有越級挑戰嘅比賽都係贏盤收場,包括今場對曼城,「讓球」盤受讓兩球半/三球,袋袋平安。不過贏唔贏到英聯盃,其實唔係布城今季最大目標,升班英超先係主菜。自從今季英冠首輪賽事之後,布城最高曾經坐過喺次席,但最近成績回落,近兩場聯賽先後輸畀狼隊同阿士東維拉,要喺下季英超再同雙曼鬥,要加把勁咯!

包羅萬有,「體」得舒服,即Like「蘋果體育」FB專頁!
BannerBanner