朗拿甸奴宣佈退休，全城懷緬這位技術曾令人嘆為觀止嘅一代傳奇，已經投入電視界做主持嘅前侯城及富咸中場保拿特（Jimmy Bullard），就搵嚟細哨曾經球不著地四次連環射中楣嘅經典片段，希望複製一次畀大家重溫。

不過，細哨只得一個，唔係點叫經典？唔係保拿特著上巴塞波衫、帶埋條頭巾叫自己做「保拿甸奴（Bullardinho）」，就可以變成細哨。結果佢試咗起碼成10幾次，唔好話連環射四次，就算兩次都做唔到，最多只係射完一次中楣反彈，控定後再射嗰吓，就一係入網一係高出，最後佢都唯有放棄呢個挑戰。不過，如果當娛樂節目咁睇，「保拿甸奴」個裝扮又真係幾過癮！

當年，朗拿甸奴幫「一剔」拍攝呢個連環四次中楣絕技，之後有人質疑係用電腦效果做出嚟，但細哨就堅稱廣告係原汁原味，無經加工或剪接，仲話平時操練就成日咁樣玩，好平常啫！