復出為「巴塞」上陣 卡卡表演賽梅開二度

更新時間 (HKT): 2018.01.29 22:00

喺去年年底決定掛靴嘅巴西球星卡卡,竟然復出為巴塞隆拿上陣,仲梅開二度添?講緊嘅係厄瓜多爾個隊巴塞隆拿。

話說上周六喺厄瓜多爾嘅瓜亞基爾踢嘅一場表演賽,呢位前世界足球先生以特別嘉賓身份,復出為厄瓜多爾名牌球隊SC巴塞隆拿坐陣,對住秘魯嘅體育青年人。喺六萬人坐爆球場下,呢位35歲球星都絕不欺場,身穿93號球衣嘅卡卡先喺上半場九分鐘襯對手門將甩手射入空門,其後喺51分鐘接應隊友傳送,輕鬆起左腳射入,協助SC巴塞隆拿以6:2大勝。

完場後,卡卡都喺twitter感謝有關方面邀請,而佢亦上載一段佢離開球場嘅短片,只見場面一片混亂,證明掛靴後魅力依然不減。呢場表演賽每年都會舉行,前年嘅特別嘉賓喺近日都宣佈掛靴嘅朗拿甸奴,而上年嘅嘉賓就係已經來港搵食嘅科蘭。

包羅萬有,「體」得舒服,即Like「蘋果體育」FB專頁!
BannerBanner