【英冠】威廉王子入場打氣 「英國周柏豪」絕殺卡城

更新時間 (HKT): 2018.04.11 22:15

禮拜二除咗上演兩場歐聯八強大戰外,英冠亦都加開咗快車;其中英國威廉王子係眾所周知嘅阿士東維拉忠實球迷,噚晚佢就同前維拉挪威籍前鋒卡維,一齊去咗維拉公園球場支持愛隊。而維拉喺星級球迷打氣下亦相當爭氣,憑「英國周柏豪」基亞利殊完場前5分鐘入波,一球絕殺賽前排喺第二嘅卡迪夫城,維拉只要再贏多場,就肯定至少拎到升班附加賽資格囉!

查實維拉今場贏得一啲都唔輕鬆,卡城上半場先有文迪斯拿寧埋門中柱,加上維拉右閘艾莫哈馬迪護住空門,加上今場嘅最佳球員、從曼聯租借嘅年輕門將森莊士東高飛低撲,維拉先可以力保不失。眼見場波要打和之際,「壞孩子」基亞利殊襯卡城球員角球解圍不遠,喺禁區頂射入靚絕窩利;而喺看台上嘅威廉王子隨即振臂高呼,表現相當興奮。

賽後英國《太陽報》仲揭發,現年四歲嘅小王子佐治同兩歲嘅夏洛特公主,都受到老竇嘅薰陶,成為咗維拉嘅球迷。而維拉領隊布魯士,就大讚入波嘅「英國周柏豪」具有魔力同好有潛質;維拉贏波後,仲追到同今場對手、賽後跌落第三位嘅卡城四分,聯賽仲淨返四輪之下,維拉雖然比較難爬上頭兩名直接升班,但只要贏多場就肯定保住前六嘅升班附加賽資格囉,只要維拉繼續過關斬將,來季英超大家或者有機會見到,威廉王子帶埋小王子小公主,一齊入場睇波呢!

包羅萬有,「體」得舒服,即Like「蘋果體育」FB專頁!
BannerBanner