內地球迷唔知鹿島喺邊 買機票去咗鹿兒島......

更新時間 (HKT): 2018.05.09 18:40

鹿島鹿角主場迎戰上海上港嘅亞冠盃16強首回合而家就踢緊,不過同時間網絡就出現咗個關於今場比賽嘅「悲劇」,又話或可以話係笑話嘅。

話說國內百度「中超吧」一位網名為「上体之王浩克」嘅網民為咗支持自己心愛嘅上港,決定今場親自飛去日本睇波,佢仲喺討論區上載咗自己行程嘅截圖,仲留言話「誰言上港無死忠?機票已訂,期待亞冠客場揚威!」

上海上港今場能唔能夠「客場揚威」暫時就未知,不過都幾肯定呢位國內球迷應該冇辦法現場睇到呢場波,事關佢竟然以為鹿島鹿角係喺日本西南部嘅鹿兒島,買咗機票過去。係呢度提提大家,鹿島鹿角其實關東茨城縣嘅球會,同鹿兒島距離差好遠。事件仲傳到去日本,搞到班日本網民笑到碌地㖭。所以話,常識真係好重要㗎......

包羅萬有,「體」得舒服,即Like「蘋果體育」FB專頁!
BannerBanner