求驗客手記:拜仁法福鬥搞勝利巡遊

更新時間 (HKT): 2018.05.22 05:20
雖然今季拜仁喺歐聯同德盃都未竟全功,老帥軒歷基斯都算係光榮引退。 美聯社

拜仁慕尼黑喺上周六德國盃決賽爆冷輸畀法蘭克福,今季埋單只係贏到德甲一項重要錦標。雖然以拜仁嚟講只贏德甲未必係好滿意嘅成績,但全隊上下都一樣開心,喺周日進行巡遊,與球迷同樂之餘,亦為今季臨時拉伕回歸領軍嘅老帥軒歷基斯送別。73歲嘅軒歷基斯喺今季接替安察洛堤,歷來第四次出任拜仁主帥,最輝煌梗係13年帶領球隊成為三冠王,深受拜仁球迷歡迎。

至於新科德國盃盟主法蘭克福,當然亦要賀一賀佢,同樣喺周日搞勝利巡遊,當地氣氛比慕尼黑有過之而無不及,數以萬計球迷聚集喺法蘭克福市政廳外面,慶祝球隊30年以來首次贏得錦標。法福教練尼高高華亦會功成身退離隊,下一站正係拜仁,接替軒帥登龍門。

包羅萬有,「體」得舒服,即Like「蘋果體育」FB專頁!
BannerBanner