求驗客手記:兩蛋贈法國返晒嚟
荷蘭踢德國降班

更新時間 (HKT): 2018.11.18 05:20

上月曾大勝德國嘅荷蘭,上星期五喺歐洲國家聯賽A1組賽事主場硬撼世界冠軍法國,靠韋拿杜姆同迪比喺上下半場各入一粒贏2:0,兩個月內連挫兩支強敵,唔怪得教練朗奴高文賽後好得戚咁話球隊已經重振雄風。不過荷蘭咁樣一贏,德國就躺着中槍,率先喺A級聯賽降班,兩年後要降格踢B級聯賽。

法國15戰不敗斷纜

朗奴高文牙擦擦

今年二月先上任嘅橙軍主帥朗奴高文,用咗九個月去重整國家隊,終於叫有番少少成績,所以賽後都講咗一堆好鼓勵性嘅說話:「我哋已經展示出可以重新企番起身,我冇諗過可以踢到一場咁精采嘅比賽,亦冇諗過成場波可以有咁強嘅控制力同閱讀球賽嘅能力,我哋踏出咗好重大嘅重建步伐。當然法國亦踢得一般,只係一直防守,如果唔係洛里斯,我哋一早已經贏到三至四球。」

包羅萬有,「體」得舒服,即Like「蘋果體育」FB專頁!
BannerBanner