趣趣地:開齋伐林泰國靠「美斯」

更新時間 (HKT): 2019.01.11 05:20

禮拜四亞洲盃A組比賽,首輪以1:4慘輸印度嘅泰國翻生,喺日職搵食嘅「泰國美斯」猜拿迪普桑格辛攻入全場唯一一球,以1:0贏咗巴林打開勝門,分組賽暫時攞到1勝1負。巴林上輪對主辦國阿聯酋踢出水準,而泰國第一場就慘負印度1:4,之後仲炒埋教練拉耶華治,結果今場亦都變身。29分鐘,巴林中場馬漢喺左路快放,之後起腳勁射近柱,但因為來勢太急加埋係彈地波,泰國門將迪辛洛安只能夠勉強拍出化解危機,半場兩隊冇交收。換邊後嘅泰國脫胎換骨,58分鐘成功打破僵局,右翼衞查斯坦多趕喺巴林守將攔截前傳中,後上嘅猜拿迪普桑格辛第一時間撞射入網,泰國領先1:0。72分鐘佢哋又有黃金機會,前鋒格賴頌喺冇人睇嘅情況下竟然射中柱,浪費大好機會。雖然格賴頌失機,但都阻唔到泰國贏波。

包羅萬有,「體」得舒服,即Like「蘋果體育」FB專頁!
BannerBanner