【中國盃】對住泰國美斯冇晒符 大簡首戰國足即輸波

更新時間 (HKT): 2019.03.21 21:57

亞洲盃失敗之後,國足似乎仍未能重新振作,禮拜四主場出戰中國盃四強即輸波,主場以0:1不敵泰國,無緣出戰決賽。有中國媒體放風,足協一早已經為暫代教練簡拿華路準備咗合同,但第一場教就輸波,好有可能會影響佢坐正嘅機會。

中國喺今屆亞洲盃失望出局,八強畀西亞強國伊朗橫掃三球,教練納比相當無癮,最終劈炮唔撈!接任國足主帥嘅係納比愛徒簡拿華路,佢同納比聯手幫意大利喺2006世盃登頂,本身亦喺中國球壇打滾多年,教過廣州恒大同埋天津權健(天津天海),適應唔係問題!

今年嘅中國盃戲碼比上年相對失色,冇咗有加里夫巴利領軍嘅威爾斯同埋有柏德列舒希克壓陣嘅捷克,由泰國同埋烏茲別克兩支亞洲隊頂上,原本好彩仲有上屆冠軍烏拉圭以衞冕身份撐場,點知最強射手蘇亞雷斯因傷退隊,綜合所有因素,戲碼真係失色好多。中國盃繼續喺廣西南寧踢,不過第一場佢哋就冇咗靈魂人物武磊,冇入選國家隊嘅佢返咗上海上港探舊隊友。

呢場對泰國嘅比賽,國足有新面孔,包括前鋒董學升同埋中堅高准翼,郜林同埋于大寶就冇入選。國足上半場踢得好被動,傳送斷纜嘅情況非常多,對住「泰國美斯」猜拿迪普桑格辛更係冇晒符。上半場14分鐘泰國有黃金機會,猜拿迪普桑格辛獨闖龍潭,中國守衛好似雪糕筒咁畀佢扭過,但最後射得太正,畀中國門將顏駿凌沒收咗。

對住泰國隊嘅快速打法,去到33分鐘國足終於失波,泰國翼鋒鐵迪盼右路地波傳中,冇人睇嘅猜拿迪普桑格辛中路飛快插入輕鬆破門,領先1:0。臨完場前國足有一次黃金機會,前鋒韋世豪同隊友撞牆配合落底線窄角度射門,泰國門將施華勒第一時間擋出,佢之後再化解韋世豪嘅補射,泰國半場維持1:0嘅領先優勢。

易邊後,國足表現冇咩起色,仲差啲失多一球,57分鐘猜拿迪普桑格辛左路一直快放殺入禁區,起腳射遠柱,顏駿凌瞓身僅僅撲出化解危機。戰至62分鐘,國足有一次難得嘅埋門機會,前鋒董學升接應頭槌頂高,錯失追平嘅機會。泰國之後有好多埋門機會,但一係欠運斜出,一係就畀顏駿凌化解,始終唔能夠擴大比數,最尾都足夠佢哋贏1:0殺入決賽,而國足就連續三屆都喺自己地頭,只可以踢季軍戰。

後備:1曾誠、13何超、14張修維、17王剛、19謝鵬飛、21譚龍、23王大雷、24傅歡、25呂文君、26李昂、28劉洋、30彭欣力

中國國家隊在年初的亞洲盃出局後,名帥納比離任改由新帥簡拿華路執教,今晚將在廣西南寧迎來上任後首戰,在中國盃對陣泰國。作為中超勁旅廣州恒大主帥,獲中國足總委任兼任國足教練,「大簡」自然挑選了不少恒大班底;對比納比領軍出戰亞洲盃的陣容,「大簡」只保留了八名亞洲盃成員,大牌球星如武磊、鄭智、郜林均沒有入選,亞洲盃出醜的守將馮瀟霆,則連同另外七名恒大球員入伍。

至於泰國今年一月曾在亞洲盃16強與中國交手,當時泰國以1:2落敗出局,今仗有多名主力如前鋒素帕猜、隊長鄧達、中場辛拿華、沙沙勒等先後落選或退隊,故兩軍今仗陣容預料都會有變動,且看「大簡」能否在殘陣的泰國身上打響頭炮。

賽制:若在90分鐘內打成平手,直接以互射12碼決勝。

包羅萬有,「體」得舒服,即Like「蘋果體育」FB專頁!
BannerBanner