【退役三岔口】 掛靴轉做教練唔係人人得 揸的士 做金融都想返轉頭

更新時間 (HKT): 2019.09.25 00:01

每個球季結束,總有球員面對退役後去路問題。掛靴,從來困擾球員,無論生涯多輝煌,脫下職業球衣便要面對在社會生存問題。90年代退役的前港隊門將陳慶榮為生計轉行揸的士,南區的前港隊後衞沈國輝今季結束18年職業球員生涯,獲球會高層安排擔任球隊助球;其弟沈國強更早掛靴,原先轉投金融業發展,但無法適應新工作最終還是回到球場。

陳慶榮(58歲/前港隊守門員/1996年掛靴/現職的士司機/丙組荃灣教練)

95/96球季,為好易通邀請隊踢罷對英格蘭的表演賽便掛靴,開始當的士司機及教練。這位前港隊門將說:「好早已考的士牌,初出道喺84/85球季加盟東方,當時初踢甲組條件唔太好,得幾千蚊月薪,唔夠維持生活,唔使操練就揸的士,揸咗年幾。轉會愉園後條件好咗,少咗兼職揸的士,但有時間都會開工幫補收入。」

香港足球從來沒有太多保障,尤其陳慶榮那年代,不像現在較多足球學校,坊間有很多足球班,球員掛靴後便可執教。他說:「以前退役就失業,冇鋪定後路就會好徬徨。自己過30歲開始受傷患困擾,知道踢唔得幾耐,要到社會捱世界,有家庭負擔就要面對現實。供養小朋友,又要供樓,壓力有,但教波同揸車都係自己鍾意,以呢兩樣作為職業唔算太困難,如成日懷念當年,要到社會做嘢就難啦!」

球員轉型初期難免有困難,陳慶榮說:「球員生活自由啲,當打時收入好過一般打工仔,而自己轉型算快,可能同鍾意揸車有關,唔覺得做的士司機辛苦。我成日同家陣嘅球員講,千祈唔好諗以前,對轉型冇幫助,完咗球員生涯就係完咗。家陣教小朋友守龍門,成日同佢哋講要面對將來,球員生涯代表港隊,退役後都唔代表啲咩,如果成日諗住以往代表香港就有光環,唔會有動力投身社會,始終離開球員身份去到另一個階段就係重新嚟過。」

他更指如有客人坐其駕的的士,也不會因此覺得很光榮,責任就是將客人送到目的地,又指現在比起當年已好很多,政府有計劃幫助退役運動員轉職,港超聯球會亦樂於聘請退役球員。

沈國輝(35歲/前港隊守衞/2019年掛靴/冠忠南區安排擔任助教/青年軍教練)

「我覺得我係幸運兒,掛靴即獲球會安排改任助教,好感謝球會高層。」17歲考入愉園青年軍,上季結束18年職業足球生涯的沈國輝說:「踢波初初已經諗幾時掛靴,到35歲係時候。其實可以再踢多季,但邊線防守球員要速度同轉身快,我30歲開始已覺身體機能減慢,亦開始思考退役後去路,當時冇諗得太遠,未有仔細諗退役後留喺球圈定搵份工,但有留意身邊前輩退休後去向。」當時他左思右想,最後還是覺得在球圈多年,球圈或體育方面工作較適合自己,他說:「出道頭幾年已開始喺青年會客串教青少年足球班,初初未諗住考牌,單靠踢波經驗教小朋友,之後開始由D級教練慢慢考上去,又不斷去學,依家考咗B牌,遲啲會考埋A牌。」

沈國輝承認掛靴前很困擾,心想如繼續踢會否仍能任球隊常規正選,並指自己不想當後備,但亦要接受年紀大的事實。他說:「上季已同細黃生(黃焯添)溝通過,覺得踢到差唔多35歲要考慮退落嚟,去到2至3月就決定掛靴。其實決定前仲係十五十六,始終唔捨得,踢完足總盃決賽至今仍未覺球員生涯已完,要慢慢接受,諗喺教練工作上做啲咩。」生活上雖沒太大轉變,但他承認球員身份較簡單,現在要思考訓練上的安排及協助主教練︰「每個球員際遇唔同,自己好幸運,感謝球會畀球員有份尊重,有歡送,又安排助教工作,效力南區四季,只有感激。有機會喺職業隊教波係好大嘅挑戰,會擔心自己做得唔夠好。」

沈國強(33歲/前港隊前鋒/2017年掛靴/曾轉行但不成功/現任全職教練)

「踢傑志最後一季狀態有啲跌,當時想掛靴就試吓轉工;職業運動員遲早要退役,學我大佬所講,踢波係後生仔嘅世界,唔想踢到33歲仲勉強踢落去,而且踢前鋒體能跌得快,狀態差就更難同外援爭位。遲早都要掛靴,寧願早啲轉型,有多啲時間適應。」沈國輝胞弟沈國強初掛靴已想轉型,但試過其他工作後才知道教練工作最適合自己:「決定掛靴後休息2、3個月就開始搵工,首選做政府工但考唔到,就試吓投身金融業。」這情況大概維持一年,其間前隊友李圳業介紹他到利物浦國際足球學校(香港)兼職當教練。

「金融業同足球完全唔同,要着西裝返工,做一般文職工作,捱咗半年,好努力做但點都差啲,唔係想像中咁,亦投入唔到。原先想試試其他工作,但講就易,實際要轉好難,可能因為自己適應較慢,工作時間亦冇踢波咁彈性。」沈國強轉任全職後,覺得足球工作較得心應手,在金融業完全想不到解決方法,但在足球上則截然不同。

「喺香港做運動員始終要擔心退役後出路,好彩自己放低足球員身份唔算太難,睇自己心態。」他指做人要向前看,偶爾想起以往代表香港出賽可以,但不可經常懷緬。「當然唔係職業球員先做到教練,但始終有優勢,知道球場上遇到咩情況應該點處理。享受依家嘅工作,就算要返辦公室,但工時較彈性,可以邊學邊做,開心過做金融。」他補充現只是起步,即使5人足球與11人足球的教法與踢法不同,將來也會繼續進修。雖然已退役兩季,但沈國輝有時在街上會碰到些球迷上前問候,未被完全遺忘,也有點欣慰。

記者、攝影:曾雁平、禤家民

包羅萬有,「體」得舒服,即Like「蘋果體育」FB專頁!
BannerBanner