【光復學界】神之隊吳欣潼望領協恩延續霸業

更新時間 (HKT): 2019.11.20 01:30
協恩隊長吳欣潼(左)直言:「對住隊友,仲對得多過屋企人。」
(蘋果日報)

協恩中學為學界女籃霸主,上季在九龍區D1學界女籃A Grade決賽擊敗寶覺後,已寫下14連霸的佳績。外界常道她們是「神之隊」,但其實協恩眾將皆為普通女生,只是全隊在背後付出比他人更多的汗水去練習。隊長吳欣潼直言:「對住隊友,仲對得多過屋企人。」

背負協恩之名而戰,要捍衞球隊的榮譽,自然要付出更多。今年將畢業離隊的隊長吳欣潼直言,在協恩的六年間,逾七成時間皆與籃球隊一起度過:「除咗校隊練習,出到去(甲組)都係同呢班人一齊練,我投放喺協恩籃球隊嘅時間仲多過讀書。」她續指在效力的甲組球隊偉邦練習得太晚,甚至跟家人相處的時間亦不多:「有時練波練到好晏,基本上返到去屋企人都瞓咗,對住隊友仲對得多過屋企人。」

精英賽的開賽時間遙遙無期,吳欣潼坦承擔心付出的努力付諸東流,但她表示要好好準備自己,應付未來的人生:「如果精英賽取消,我會唔開心同覺得可惜,因為精英賽係一個好大嘅舞台,畀學生球員去表現自己。我覺得大家咁努力練波,就係為咗打精英賽。不過驚嘅同時,我哋都要隨時準備開波。」

代表協恩出賽對吳欣潼而言是學習階段,她希望在最後一年擔當領袖角色,完成球隊的傳承:「可能中一入嚟係畀人帶住,要向師姐學習,而我去到中六就係要做番呢個角色。學咗咁多嘢,就要畀番咁多出嚟。」這位射手更笑言,今年在陳欣汶和劉芳盈等人離隊後,自己亦應挺身而出:「我哋今年走咗好多主力,自己嘅責任大咗,要做嘅嘢比上年更多。不過今年係我最後一年代表協恩,無論係學界或所有籃球比賽,對我嚟講都係一個好好嘅回憶。」然而,能否繼續領軍稱霸,除了努力,還要聽天由命。

記者、攝影:許嘉明

包羅萬有,「體」得舒服,即Like「蘋果體育」FB專頁!
BannerBanner