【6點半體場●今日Read IG】為足球多次落淚嘅美魔女 「Madam Pang」搞波出心又出力

更新時間 (HKT): 2019.12.17 18:30

過去今日Read IG多數都介紹年青貌美身材又好嘅運動界美少女,今次不如轉下口味,同大家介紹一位媽媽級嘅「美魔女」。一般球迷認知嘅球會主席都係男人,但泰超球隊泰港嘅主席就係人稱「Madam Pang」嘅倫盼(Nualphan Lamsam)。而Madam Pang早前亦都以泰國女足領隊身份出戰今年嘅女足世界盃,更喺對瑞典嘅比賽射入一球後場邊激動落淚,成為咗一時佳話。

現年53歲嘅倫盼雖然係泰國人壽CEO,但對足球都相當有熱情,既係泰港球會主席,又係泰國女足嘅領隊。今年泰國女足出戰女足世界盃,雖然曾經慘敗0:13畀美國,但對瑞典一役尾段成功射入一球,Madam Pang喺場邊同教練攬埋一齊,仲激動落淚,連New York Times都有報道。而Madam Pang因為足球喊喊都唔止一次,4年前泰港降落泰甲,完場後球隊喺場邊多謝球迷支持嗰陣,就被拍到忍唔住落淚,嗰條片就有超過100萬點擊。而今年泰港歷史性捧起泰國足總盃,終於喺Madam Pang入主5年贏得第一個冠軍,下年仲有得打亞冠外冠軍外圍賽,都算可喜可賀。

Madam Pang被香港有名講泰國波嘅博客冬蔭波稱為「神仙姐姐」,當然係因為外貌有番咁上下。雖然已經年過50,但氣質依然,加上對足球嘅熱誠,令佢IG家下都有48萬followers。如果下次去開泰國想搵波睇,不仿試下去泰港主場撞Madam Pang。

包羅萬有,「體」得舒服,即Like「蘋果體育」FB專頁!
BannerBanner