【陰公】簡東拿啜核比喻 「曼聯啲波就似阿伯搞嘢 有心無力囉」

更新時間 (HKT): 2019.12.25 11:40

啱啱禮拜日嘅英超曼聯作客鬥榜尾嘅屈福特,就因為迪基亞的低級犯錯同埋雲比沙卡禁區犯規被罰12碼,爆大冷以0:2不敵屈福特,繼續徘徊中游位置。而球隊令人嘅失望嘅表現,就連「奧脫福大帝」簡東拿都睇唔過眼,直指家下嘅曼聯就好似阿伯要行房咁,好多時都有心無力囉。

雖然紅魔之前連殺熱刺同曼城,氣勢一時無兩,不過之後打和愛華頓同屈福特,就好似一盤冷水照頭淋。搞到最近呢位法國傳奇前鋒接受訪問時,都要抽下前東家水,「曼聯一直係我心目中有特殊嘅地位,但家下睇曼聯嘅比賽,就覺得好似一個阿伯想搞嘢咁,雖然真係好努力,但真係會令人失望囉!」而年屆53歲嘅大帝就表示,呢個只係一個比喻,唔係佢自己嘅經歷喎!

之前雖然踩到咁盡,但大帝其實對曼聯都好有愛,之後都話相信紅魔好快就會再次重返巔峰,因為佢哋係世界上其中一間最大嘅球會。不過睇個勢,呢位「阿伯」可能都要一段時間先可以回春再現雄風。

包羅萬有,「體」得舒服,即Like「蘋果體育」FB專頁!
BannerBanner