【亂世長跑手】中大 理大被圍攻感震撼 黃尹雋堅持衝奧做港男第一人

更新時間 (HKT): 2020.01.01 00:01

說起香港長跑,以往多談及紀嘉文、陳家豪及姚潔貞等名將,不過黃尹雋在去年的10公里挑戰賽打破塵封15年的香港紀錄,及後再破5,000米及馬拉松港績,僅得四年跑齡的他一躍成香港長跑界icon。屢屢跨越前人,黃尹雋反而顯得淡然:「我終極目標係做第一個跑奧運馬拉松嘅香港男運動員。」癡人說夢?「做乜嘢都好,放棄就會失去所有,堅持落去先會成功。」

有別一眾自中學已在田徑場上揮灑汗水的前輩,黃尹雋中學打籃球及射箭,與長跑沾不上邊。中六那年,他被邀請入越野隊「湊人數」,參加了人生第一場跑步比賽:「當時有打籃球學界,有整學界證,加上就快畢業,心諗一試無妨,就應承入隊。」升上大學後,同系師兄得悉他曾跑越野賽,遂邀請他加入大學越野隊:「我冇上莊(擔任學會內閣幹事),喺大學好得閒,無聊就去試吓。」四年前的無心插柳,令他踏上無盡的長跑之路。

首年大專賽後,黃尹雋開始與隊友出外參賽,系統化的恆常訓練加上比賽,使他在大學二年級時已突飛猛進,成績更勝有10年跑齡的隊友︰「Year 3加大訓練量,想試吓自己可唔可以喺大專賽拎到頭三,睇吓自己極限喺邊。」連續兩年在大專越野賽及大專田徑賽5,000米項目跑進三甲,令黃尹雋在長跑界漸露頭角,前年的港島10公里賽跑,更令他聲名大噪,皆因他只差五秒就能打破「香港首席鐵人」李致和所造出、塵封達15年的香港紀錄。黃尹雋坦言當刻有少許失望,不過如今回想,當年準備不足,心態亦未成熟:「比賽前一日仲會去打籃球,甚至開跑前五分鐘先到起跑線準備,好多地方做得唔好,破唔到紀錄好合理。」

調整心態重新出發,從休息到訓練紀律,黃尹雋着重每個細節,終在去年10月的10公里挑戰賽將香港紀錄改寫至30分51秒,5日後再在澳門城市田徑邀請賽再打破塵封41年的5,000米香港紀錄。狀態大勇的黃尹雋其後於12月的日本防府馬拉松跑出2小時20分58秒,打破由英國跑手在36年前造出的舊香港紀錄。2個月內3破港績,黃尹雋終以雙腳跑出自己的一片天。不過,每每問及破紀錄感受,他都顯得很淡然:「其實預咗,破紀錄只係最低要求,唔會將目標只係放喺紀錄上。」

聞者或覺是口出狂言,但知道黃尹雋所見所聞,或會明白這是他的肺腑之言。去年三月,他首次代表香港出賽,參戰國際田聯的越野跑世錦賽。雖知難與世界級選手匹敵,但無疑是次很好的經驗,令他體會到自己的不足:「落到場同其他選手平排,已經感受到佢哋嘅氣場;就算大家身形相若,但對手肌肉結實好多,自己個身仲鬆吓鬆吓。」黃尹雋深明要再進步,目光不可只放在香港:「你可以喺外國選手身上睇到點成為優秀運動員,佢哋好清楚自己目標,會做好每個細節。好多人講理想講目標,但如果唔可以化成實際行動,講再多都冇用。」「心態決定境界」雖是老掉牙的名言,但要在長跑路上取得成功,堅持確是不二法門。

長跑訓練動輒大半小時,相比身體上的疲憊,無盡的孤獨感或更難熬。黃尹雋笑言自己曾很怕悶,幸他一路走來,有一班同路人「齊上齊落」,才能抵住最初的孤獨感。跑友Louis與黃尹雋四年前跟隨同一教練練跑,初相識已感受其獨特氣場︰「練跑一開始會緩步跑熱身,好多人都係教練點講就點跑,但佢(黃尹雋)成日會問『點解要咁跑?』、『跑咁長會唔會影響之後訓練或者比賽?』」他笑言黃尹雋是個現實的人,做事前會先考慮回報,甚至曾說過「香港跑步冇前途,點解仲要跑?」想不到現時成為三項港績保持者,甚至有意衝奧。

認清目標後,黃尹雋為可以跑得更快更遠,大學畢業後到中大攻讀體育運動科學系碩士。為期2年的課程本在今年5月完成,但就因反送中運動令第一學期提早結束,或打亂他的計劃。眼見兩間母校戰火連連,黃尹雋坦言:「喺新聞上睇到嘅畫面都好震撼,始終以往有好多時間喺兩間大學讀書、生活、練跑,係充滿回憶嘅地方。」黃尹雋坦言可為母校及香港做到的事不多,故心情難免受影響,只希望可靠成績帶給港人正能量。

不少年輕人過去半年「發夢」,夢想將香港變得更好;黃尹雋亦有個「奧運夢」,「發夢」成為首個出戰奧運馬拉松的香港男運動員。縱在起跑線落後,但志氣絕不比前輩低:「由細到大都希望做到件令自己驕傲、令人哋記住嘅事。容易嘅事其他人已經做過,困難嘅事先要你去做。」的確,夢想在實現前都是遙不可及,惟有堅持下去,才見黎明來到。正如黃尹雋兩破港績後說道:「6日2個香港紀錄,靠的只是一直堅持,香港人也可以一直堅持,成果總會來到。」

包羅萬有,「體」得舒服,即Like「蘋果體育」FB專頁!
BannerBanner