【一夜狂歡】開心完就要還 曼城球員同完22女模開P被老婆問罪

更新時間 (HKT): 2020.01.16 13:30
據指有曼城球員被另一半興師問罪。
(社內相)

噚日本報都報道過,話曼城球球員喺作客6:1大勝維拉之後,就急急腳返去曼徹斯特,但原來係因為有下場,約咗22個來自意大利,喺instagram薄有名氣嘅model一齊開P,狂歡一晚。不過癲完一晚之後,曼城眾將都有返屋企交人之時,就有指有球員被自己另一半興師問罪。

據太陽報嘅報道指,有消息人士爆料,一位國腳級嘅曼城球員當日玩到第二朝7點先返屋企,成晚唔見咗人就梗係躁底喇,當然要審返夠本先。而更大鑊係知道原來個party入面咁多女model一齊玩,當然就更加火滾,所以搞到嗰位國腳級球員成日無覺好瞓,仲可能要跪玻璃添。不過都有傳言話,其實兩批人係分開玩,只不過咁啱都喺Mere Golf Resort咁解。

而唔少報道都繼續講緊當晚party有邊22個女仔,包括噚日報道中有提到嘅model好似Amira Paula、Marta Tejada同埋Isa Rivera,呢三位都因為有喺自己instagram上載相同片,所以估計有份,不過事後都已經private咗自己account。之後意大利傳媒再搵到芭蕾舞舞蹈員嘅Chiara Battolay,懷疑佢都係有份參與。據報22人名單中最具名氣嘅就係家陣Sport Italia做緊主持嘅Chiara Giuffrida,當時佢ig上載咗一張係酒店門口影嘅相,不過家下喺佢IG已經唔見咗。

包羅萬有,「體」得舒服,即Like「蘋果體育」FB專頁!
BannerBanner