求驗客手記:無視開快車照搞生日P
尼馬攬完女即射波

更新時間 (HKT): 2020.02.05 02:20

巴黎聖日耳門(PSG)嘅巴西前鋒尼馬,每年二月都會大搞生日P賀自己牛一,今年亦唔例外,佢禮拜日就喺巴黎搞咗場「白色派對」,慶祝自己禮拜三正式踏入28歲。不過球隊周中法甲快車就要鬥南特,教練杜曹已經批評過尼馬呢個P會影響軍心,結果尼馬禮拜一以肋骨受傷為由,被剔除喺作客南特嘅大軍名單外,真傷定被罰就不得而知喇。

全白造型疑派帽

杜曹暗寸冇紀律

話說法甲開緊快車,尼馬呢個生日會,正正夾喺PSG上周六對蒙彼利埃同周中對南特兩場波中間。其實,PSG教練杜曹上場賽後就已經講明尼馬呢個P會影響隊波:「咁樣做除咗會分心,仲會令人覺得我哋唔專業同唔認真。」不過就強調唔會因呢件事雪藏尼馬,但就有暗寸呢位巴西前鋒冇紀律,所以佢本人都冇出席。結果禮拜一,球會就話尼馬喺上周六嘅賽後檢查到肋骨受傷,將佢剔除出周二作客南特嘅大軍名單。不過見佢開P冇病冇痛,今次嘅缺陣好可能係杜曹秋後算賬「被受傷」,懲罰呢位野性難馴嘅球星。

包羅萬有,「體」得舒服,即Like「蘋果體育」FB專頁!
BannerBanner