【武漢肺炎】體壇停擺球衣店陷寒冬 老闆:慘過沙士金融風暴

更新時間 (HKT): 2020.03.27 00:01

武漢肺炎疫情席捲全球,歐美各國無一倖免。疫情月初更蔓延至體壇,NBA、意甲、英超球員接連確診染病,各大賽會先後宣佈暫停賽事,原訂在夏天舉行的歐洲國家盃及東京奧運亦要延至明年舉行。全球體壇一個月內幾乎全面停擺,首當其衝除了是一眾體育迷,本地球衣店同樣叫苦連天,有店主預計未來幾個月生意至少下跌3至4成,形容情況比沙士及金融風暴時更為惡劣。

本地足球球衣店Kitroom Sports負責人Kan表示,每逢舉行歐洲國家盃及世界盃的雙數年球季,生意普遍較好,但多數是賽事開鑼的月份才有明顯升幅。至於預訂球衣方面,公司一般在賽事開打前幾個月向供應商訂貨,再接客戶訂單。早前歐國盃宣佈延期後,Kan亦收到客戶查詢已訂的國家隊球衣去向:「有客戶原本訂咗都有打嚟問,但我哋都要睇供應商嗰邊,會唔會按原定時間出貨,定會遲出貨,等佢哋通知點樣去處理。」不過,他補充指國家隊球衣普遍每兩年換一次款,即使歐國盃延期一年舉行,按道理仍會穿着同一球衣出賽,影響不算太大,暫未收到退訂要求:「普遍都係覺得遲少少都唔緊要,反正都未開波,大家都傾向會等。」

踏入球季季尾階段,生意本已較為淡靜,加上遭逢疫症肆虐,令國際球壇全面停擺,Kan坦言現時面對挑戰前所未有:「其實生意由舊年聖誕到家陣都好差,舖面生意至少都跌咗一半。公司今年做到第15年,今年情況可以話係最差。」他難料今年全年生意跌幅,僅稱今年「已完」:「今年嘅聯賽賽季基本上已經無咗,加埋歐國盃延期,家陣只係等疫情減退,各大聯賽宣佈未來嗰9個月會點樣安排,我哋先可以再諗點樣再去重新部署,而家只能夠盡量頂住。」原本打算趁歐國盃賽期帶動生意,如今部署被打亂,要重新調整營運策略。Kitroom Sports現時主要靠不同的優惠推廣,配合網上銷售,以郵寄或速遞的方式交收,希望吸引客人消費,維持收入。

歐洲足壇全面停擺以外,屬北美四大聯賽之一的NBA同樣受武漢肺炎疫情波及,至今已經有7支球隊、共14人確診感染,同樣復賽無期。NBA產品專門店Shooting Five店主黃傑指1月底疫情爆發初期,傳出籃壇巨星拜恩離世噩耗,當時仍有不少客人上門找尋其相關產品,而且球賽如常舉行,故生意未受太大影響。不過,隨着疫情蔓延至歐美地區,月中NBA職球員接連確診武漢肺炎,導致賽事全面停擺,對生意的影響開始浮現:「NBA未停,大家都仲會好有心去買嘢,因為仍然會做運動、會睇波,但家陣開始停擺,大家連唯一嘅娛樂都無埋,對相關產品嘅購買慾都自然會低咗,近呢一兩個星期生意開始回落。」過往4至6月正值季後賽及總決賽賽期,銷情一般較常規賽時好,但最近有報導指,多支NBA球隊班主料最快6月才能復賽,黃傑保守估計未來幾個月生意至少下跌3至4成。

經歷過沙士及金融風暴等難關,他不諱言今次疫情加上NBA停擺,是開業近20年所面臨最大的挑戰:「沙士嗰陣啲人都係好惶恐,但外圍氣氛無咁差,今次疫情蔓延到去歐美,係令到所有球迷甚至普通人都受影響。雖然已經做咗咁多年,但我哋都預計唔到未來會唔會有更差情況發生,或者可能疫情好快結束,而家只能夠盡力做。」黃傑指當年沙士時,政府都鼓勵市民多做運動增加抵抗力,預防疾病,但如今康文署設施全面關閉,甚至呼籲避免外出,足見疫情嚴竣程度。全城人心惶惶避免外出,Shooting Five現多用電子貨幣及郵寄方式交易,希望儘量滿足客人要求,助他們買得心頭好。

記者、攝影:麥卓溢

包羅萬有,「體」得舒服,即Like「蘋果體育」FB專頁!
BannerBanner