求驗客手記:紐記「喜鵲」變鳳凰有暗湧

更新時間 (HKT): 2020.04.23 02:20

紐卡素本來以為俾沙地阿拉伯王儲穆罕默德收購,就可以「喜鵲」變鳳凰,點知仲有變數。事關英超海外轉播最大合作夥伴beIN Sports,佢個卡塔爾籍CEO尤錫夫,同埋國際特赦組織都寫咗信畀英超,話一旦「喜鵲」由沙地王儲擁有,就會影響英超形象,仲叫大家否決交易㖭。

先講beIN Sports嗰筆,話說喺中東有個老翻台叫beoutQ非法播緊英超比賽,仲有傳聞話沙地國營衞視Arabsatm原來靜雞雞畀訊號beoutQ,咁beIN Sports當然唔高興啦,其實英超之前告過Arabsat但告唔入。所以beIN Sports就話,俾沙地王儲買紐卡素直情係引狼入室!至於國際特赦組織就話沙地嘅人權紀錄認真麻麻,呢次王儲買紐記係為咗「洗底」,對足球根本冇heart。不過講真,你有你反對,英超俾武漢肺炎搞到亂晒籠,難得有人仲肯投資,否決交易嘅機會應該都唔大。