求驗客手記:用天使做籌碼換普巴 PSG咪搞笑啦

更新時間 (HKT): 2020.04.27 02:20

繼早前國際米蘭話對曼聯中場保羅普巴有興趣後,近日又有報道指法甲班霸巴黎聖日耳門(PSG)亦同樣有意將呢位法國國腳收歸旗下。不過,當中最有趣嘅係,有指PSG竟然將紅魔舊將「天使」迪馬利亞作為交易籌碼!今季普巴一直受傷患困擾,英超聯賽停擺之前只為曼聯喺聯賽上陣過七次,雖然領隊蘇斯克查一直堅持普巴仍然係紅魔嘅重要一員,但呢位27歲中場同球隊嘅合約出年屆滿,但到𠵱家仲未有任何續約嘅消息,加上冬季轉會窗簽入波基斯費南迪斯(B費)後,普巴喺陣內嘅重要性大跌,離隊似乎只係時間問題。繼皇家馬德里、祖雲達斯同埋國際米蘭以後,PSG亦同普巴扯上關係,聽講PSG喺交易中加入兩位球員作為籌碼,包括德國中場達斯拿,同埋曾經短暫效力紅魔嘅迪馬利亞。2014年夏天迪馬利亞曾以破球會轉會費由皇馬轉投曼聯,但表現未得到魔粉認可,結果效力短短一季就出售畀PSG。去季雙方喺歐聯16強正面交鋒,當時迪馬利亞更喺奧脫福回應球迷嘅挑釁,有報道話天使私下非常抗拒有關曼聯嘅事,睇嚟回歸嘅可能性極低。

包羅萬有,「體」得舒服,即Like「蘋果體育」FB專頁!
BannerBanner