求驗客手記:熱爆全球都被武肺玩殘 
抬棺隊長最想serve細哨

更新時間 (HKT): 2020.05.12 02:20

「黑人抬棺舞」早前喺網絡爆紅,相信各位球迷見到呢幾位黑人着晒老西,合力抬住一副棺材嘅相,個腦已經響起熟悉嘅電子音樂。早排棺材舞隊長Benjamin Aidoo就話自己嘅偶像係巴塞隆拿嘅美斯,最近佢接受訪問就話,有機會嘅話最希望送「細哨」朗拿甸奴最後一程,仲話武漢肺炎搞到佢冇晒生意。我諗細哨聽到真係唔知有咩反應好,希望Benjamin生意好番,但唔係佢自己去享受服務啦。

抬棺舞致敬球場舞蹈家

講起「哨牙蘇」就爆seed

雖然Benjamin係巴塞同美斯球迷,但就講明好憎一位美斯喺巴塞嘅前線拍檔,佢係邊個?咪就係蘇亞雷斯囉!原因係呢位烏拉圭前鋒喺2010年世界盃對加納嘅8強戰,喺下半場補時階段「龍門上身」用手擋走對方嘅必入波,搞到加納最終喺互射12碼階段被淘汰。Benjamin話:「每次我見到蘇亞雷斯,甚至只係聽到佢個名,我都會覺得好唔順氣!因為佢嘅故意手球令加納入唔到四強,真可惡!我哋加納呢度有個講法,就係蘇亞雷斯代表『唔可能』,當想做一件事嘅時候,只要佢出現,咁就代表你永遠都唔會成功。」相信Benjamin同佢嘅團隊就唔會「服務」阿蘇喇。

包羅萬有,「體」得舒服,即Like「蘋果體育」FB專頁!
BannerBanner