【誰人又相信】27年感情現婚變危機 史高斯太太摘婚戒搬離愛巢

更新時間 (HKT): 2020.07.12 14:10
曼聯名宿史高斯同太太傳出婚變。

「誰人又相信,一世一生這膚淺對白。」陳奕迅《K歌之王》嘅歌詞,或者唱出咗曼聯名宿史高斯嘅心聲。結咗婚都未必代表能夠白頭到老,好似呢位紅魔傳奇中場咁,同太太卡莉(Claire)已經一齊咗成27年,但係據英國《太陽報》周六報道話,佢太太已經搬出咗兩人多年嘅愛巢,就連手上嘅婚戒亦都除埋,睇嚟已經對呢段婚姻死心。

史高斯同太太相愛多年嚟一直感情要好,男方仲經常喺IG上載同太太嘅相放閃,但對上一次原來已經係2月嘅事。最近,卡莉就被發現搬離咗兩人一齊住咗21年嘅愛巢,依家住喺距離史高斯約20分鐘路程嘅地方,出去買嘢嗰時,仲被傳媒影到手上嘅婚戒消失咗,傳出婚變疑雲。有知情人士就話,佢哋已經對對方厭倦:「佢哋兩個都係好顧家嘅人,一直齊耐,冇人估到會有呢個情況發生。」

45歲嘅史高斯喺18歲落酒吧飲嘢時識到同齡嘅太太,拍拖6年之後決定拉埋天窗,一齊生咗3位小朋友。2004年夏天他踢完歐洲國家盃後就退出英格蘭國家隊,當時先得29歲嘅他,仲好sweet咁話係因為太掛住太太卡莉,點知到今年4月就話其實自己好後悔。史高斯成為曼聯92班最新一位有感情問題嘅成員,此前傑斯同畢特等都已經同佢哋嘅太太離婚,另有一位消息人士話:「諗到佢哋個班就傷心,得加利尼維利兄弟同碧咸有美好嘅婚姻,不過一齊得耐,就係會有呢種事發生。」

包羅萬有,「體」得舒服,即Like「蘋果體育」FB專頁!
BannerBanner