【槍手捧盃】半場hard sell「我最期待瑞典超級聯賽」 CCTVB直播冷門波

更新時間 (HKT): 2020.08.02 16:17
藝人郭子豪宣傳直播球賽時講:「我最期待就係瑞典超級足球聯賽!」
(互聯網)

抗疫留家期間,星期日凌晨大台又有英格蘭足總盃決賽呢場免費好波睇。大台繼績有「球壇8+1upper」陳偉豪講波,固然吸引,比賽又有兩大爭議點,但成個直播重點,可能落喺半場嘅一個廣告,事關藝人郭子豪竟然興奮咁講:「我最期待就係瑞典超級足球聯賽!」

唔知大家睇波習慣係點,筆者通常半場會淥個杯麵、去個廁所,順便洗個面。撞鬼唔知點解睇呢場波時,偏偏冇去到,留喺電視機前碌吓電話,突然就聽到有人好興奮咁講:「我最期待就係瑞典超級足球聯賽!」我當堂嚇一跳,以為自己聽錯。筆者睇咗咁多年波,都真係未睇過瑞典超,熟波嘅可能都識得馬模、希爾星堡,仲有同足總主席貝鈞奇隻馬同名嘅天狼星呢啲球隊,應該11個球員名都嗡唔出。筆者認為,郭子豪應該對瑞典有啲情意結,或者喺英國讀書時有老友家陣踢緊瑞典超,先可以講得咁有感情,亦想高度讚揚大台,照顧到小眾球迷需要。

其實大台嚟緊四年都有英足盃直播權,不過就未必再係免費播喇;另外大台都仲有韓職,呢排都一直有免費播畀大家,當然筆者希望大台可以爭取播中超同中甲喇,想擁抱祖國就當然啦,但最想嘅係睇陳俊樂同梁諾恆嘅表現呀!

-----------------------------

https://www.fb.com/appledailysports

包羅萬有,「體」得舒服,即Like「蘋果體育」FB專頁!
BannerBanner