Goal富帥:AZ夠「牙」力讓得起

更新時間 (HKT): 2021.01.15 02:00

周中兩口推介都中,呢啲基本嘢,最驚喜係推介阿爾克馬爾(AZ)下盤,結果仲作客炒燕豪芬3:1;其實荷甲冇以往咁懸殊,幾隊實力都好接近,AZ季初因為歐霸盃搞到戰績麻麻地,近期可以「追落後」,周六炒得起下游嘅海牙。

荷甲四大勁旅,阿積士叫做攻力最強,但都唔算穩定,飛燕諾同AZ開始上力,燕豪芬就平平穩穩,睇嚟呢四隊餘下賽事都有排鬥。AZ季初成日失分,最奇怪係成日尾段失波,最經典一場係作客鹿特丹斯巴達,領先四球下竟然俾人追成平手。喺歐霸盃出局後,AZ集中番精神踢本土賽事,完全變成另一隊波咁,12月至今只輸1場,其餘6場拎到4勝2和。以AZ近期氣勢,就算下場荷盃要鬥阿積士有後顧,海外莊家今場照樣開得幾辣,AZ主W平均值只得1.13倍,差唔多讓到兩球,足智彩就未知開[-1]定[-2]。海牙係黃大仙有求必應,對同級嘅芬洛都輸1:4,今次仲要作客,對住近2場主場入到8粒波嘅AZ,海牙輸三粒已經有交代,開[-2]「主勝」仲好分,要得過。

下星期日荷甲仲有大戰,阿積士主場鬥飛燕諾;阿積士剛簽入韋斯咸前鋒施巴斯坦賀拿,攻力更加強,不過球隊近期應付幾多硬仗,頭先講過飛燕諾正上力,呢班波最勁係防守,已連續三場冇失波,近7場未試過單場失多過1球。對住疲兵阿積士,相信先求穩守,「入球大細」中位數開到[3.5球]附近,捧硬「細」。

文:Goal進

截稿前馬會尚未開盤,盤口僅供參考,讀者記得留意足智彩網頁。

資料寶藏

1.海牙作客戰績8戰2勝2和4負,未算最差,不過累積失19球,是荷甲作客失球最多球隊。

2.紐卡素噴射機是澳職開季唯一兩戰全敗球隊,累積失三球亦是澳職最多。

包羅萬有,「體」得舒服,即Like「蘋果體育」FB專頁!
BannerBanner