Goal富帥:摩納哥追「大」佳品

更新時間 (HKT): 2021.02.02 02:00

之前講過唔少聯賽都有新思維,以往俾人感覺好少波入嘅法甲,其實今季入波都唔少,平均每場入2.76球,比上季多0.2球。講到法甲攻力強嘅球隊,大家一定留意住巴黎聖日耳門同里昂,不過其實摩納哥都默默起革命,趁住莊家未大幅調高「入球大細」中位數,周三主場對尼斯可以繼續追「大」。

摩納哥2017年拎完法甲冠軍,結果就俾人拆骨,基利安麥巴比、 法賓奴泰華利斯、班捷文文迪等都俾豪門挖走晒,前季仲差啲降班,好彩尼高高華上年做教練,執番正晒隊波,仲靠之前喺德國嘅人脈搵到好嘢,德國前鋒禾蘭今季已經攻入11球,排射手榜第三位,另一位前鋒賓耶達(圖)亦都好勇。難得摩納哥前邊入得,後面又失得,近6場只有1場保到清白身,今季22場聯賽竟然有18場總入球3球或以上,聯賽亦已經連續六場開「大」,好彩足智彩開盤仲算保守,上場對南特都仲有中位數[2.5/3],「大」可以放心追捧。

對手尼斯講真又唔似「大」,上仗對聖伊天都只不過輸0:1,近5場亦未試過單場入波多過1球。不過呢場同摩納哥屬於打吡戰,職球員就特別亢奮,首循環主場輸1:2,上季兩循環都開「大」,包括作客輸1:3,呢場都會多波入。

買「大細」除咗留意入波多,失波多都係關鍵,周三另一場心水就係梅斯主場對蒙彼利埃。蒙軍雖然只排中游,但佢哋係法甲失波第二多球隊之一,近期仲好似缺堤咁,近3場失9球,靠失波已經夠開「大」,難得前線仲入到波,既然攻強守弱,一樣可以買「大」。

文:Goal進

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner