Goal富帥:祖記秤先過國際

更新時間 (HKT): 2021.02.02 02:00

意大利盃今個周中嚟到準決賽,爭一場波就會入決賽,四隊波決心都唔使懷疑,所以盤口都好均勢,介乎平手、讓平/半之間,關鍵真係睇邊個把握好啲。

先講星期二國際米蘭對祖雲達斯呢場先;唔少人估祖記勝負,係睇基斯坦奴朗拿度(C朗、圖)上唔上陣,上場仲有C朗壓陣下,以2:0擊敗森多利亞。今次到意盃,之前晉級過程,C朗上陣時間真係唔多,上圈大勝史帕爾,C朗都係踢幾分鐘,呢場波C朗踢唔踢都要問吓派路先。

上月中祖記同國際就喺聯賽碰頭,國際主場贏2:0,派路今場波就一定要調整,起碼先做好防守反擊。論人腳,祖記就一定唔比國際遜色,有自稱世界級前鋒盧卡古在陣嘅國際就有一個通病,對住弱隊要佢哋圍攻,反而冇咩明顯板斧,相反當對手採取中前場壓迫戰術,俾國際有邊線發動反擊機會,反而係國際嘅入波武器。如果派路睇到我嘅分析,希望佢可以調整到防守戰術,小弟始終對盧卡古不敢恭維,所以我重心都係放落祖雲達斯身上。

另一場星期三拿玻里主場對阿特蘭大,阿特蘭大喺前兩日聯賽大戰拉素,好明顯有啲顧慮,留力今場盃賽,寧願俾個別主力輪換,結果拉素踢得非常之好贏3:1。不過今次又唔可以睇死阿特蘭大,始終佢哋進攻層面上比上仗大增,留晒力希望全力一擊想打沉拿玻里。拿玻里喺加度素帶領下,表現絕對唔穩定,上月已經有被炒消息傳出,之後贏番兩場波,但對手只係弱旅,唔代表好轉。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner