求驗客手記:美斯合約:「加獨」可免費離隊

更新時間 (HKT): 2021.02.04 02:00
■原來加泰成功獨立嘅話,美斯就可以自由身離開巴塞。資料圖片

西班牙《世界體育報》幾日前洩露美斯同巴塞隆拿喺4年前簽落5.5億歐元(約52億港元)嘅天價合約後,周二再披露合約中更多細節,其中一條條款竟然係加泰羅尼亞若然成功獨立,呢位阿根廷球王就可以回復自由身。《世界體育報》早前公開嘅合約條款,當中最受注目係1.1億歐元續約獎金同超過7,000萬歐元嘅忠誠獎金,另外仲有條文要求美斯以「融入加泰羅尼亞社區及文化」作宣誓,作為換取呢份體育界史上最豐厚合約嘅條件,希望可改進佢對加泰語言同文化嘅了解。最令人意外嘅一項條款,係如果加泰成功爭取獨立,令巴塞被踢出西甲嘅話,咁美斯就可以成為自由身球員,免費離開球會。此外,合約亦規定美斯要採取適當嘅個人行為操守,同埋保持良好生活節奏,可以永遠豁免進行興奮劑測試等。不過,呢份四年前所簽嘅合約,嚟到今日就剩番五個月,美斯目前已從中賺取咗5.11億歐元。

包羅萬有,「體」得舒服,即Like「蘋果體育」FB專頁!
BannerBanner