求驗客手記:奧燒土超「地標」交到貨

更新時間 (HKT): 2021.02.04 02:00

啱啱由阿仙奴轉投費倫巴治嘅德國中場奧斯爾(右),周二進行土超「地標戰」,後備上陣協助球隊作客贏哈塔斯堡2:1。自去年3月代表阿仙奴上陣鬥韋斯咸後,奧斯爾就俾領隊阿迪達棄用,上月終於同兵工廠達成協議離隊,同費倫巴治簽約三年半。呢位土耳其裔中場今場喺第77分鐘後備上陣,仲間接成為贏波功臣,喺完場前兩分鐘,卡迪奧古接應奧斯爾傳送後喺右路傳中,搞到哈塔斯堡門將「擺烏龍」,令「奧燒」有個好開始。奧斯爾賽後透過twitter表示:「首次代表費倫巴治上陣真係好激動。恭喜球隊攞到關鍵三分,特別要感謝我哋嘅門將巴恩迪亞。」

包羅萬有,「體」得舒服,即Like「蘋果體育」FB專頁!
BannerBanner