求驗客手記:嫌悶頂盡教埋2022世盃 
文仙尼欽點接班人

更新時間 (HKT): 2021.02.05 02:00
■文仙尼帶領下意大利(藍衫)變番歐洲勁旅,要接佢棒壓力都咪話唔大。資料圖片

喺武漢肺炎仲未緩和下,已經延期咗一年嘅歐國盃到底搞唔搞得成仲係未知數。幾年前陷入低潮、無緣打入2018年世盃決賽周嘅意大利,近年喺教練文仙尼帶領下已經變番歐洲一流勁旅,仲係歐國盃其中一隊熱門。不過文帥最近表示,過咗2022年卡塔爾世盃就唔會再帶國家隊,但佢都留咗三個人名,包括前祖雲達斯主帥艾基利、愛華頓領隊安察洛堤,同埋阿特蘭大教練加斯柏連尼,認為都係適合接任人。

2018年衝擊世盃失敗之後,文仙尼就接任意大利國家隊教練一職,球隊成績亦慢慢提升,包括歐國盃外圍賽10戰全勝晉級,上年嘅歐國聯都打入決賽周,而且任內仲有摩斯堅恩同尼高路辛尼奧路等小將得到上陣機會,一洗意大利老氣橫秋嘅感覺。

不過最近呢位56歲主帥出席電視節目講到,自己希望帶完意大利踢埋2022年世盃就走,「我當然想帶意大利打世界盃,但我哋先考慮嘅係嚟緊嘅歐國盃,之後到歐國聯。不過教國家隊比賽太少,有時真係好鬼悶。所以2022年世界盃後,我唔會再做國家隊教練,我會教番球會。」

手機用戶請按此放大圖表

三名帥各有所長

文仙尼就講咗三位佢覺得適合接任嘅人選,有帶領祖記完成完意甲五連霸嘅艾基利,另外仲有三奪歐聯嘅安察洛堤,仲有近年帶「意甲之光」阿特蘭大帶得有聲有色嘅加斯柏連尼。前兩位已經係一流名帥,所以都相當多人爭,就算艾基利家陣冇嘢撈,但有關佢嘅傳聞都唔少,早排就有傳皇家馬德里想搵佢接替施丹,所以意足總要請得郁佢兩位都要花啲心機。

至於名氣最低嘅加斯柏連尼曾經帶領過國際米蘭同熱拿亞,近年仲帶到阿特蘭大成為意甲神奇球隊,不過佢主張嘅3-4-3出名難踢,要喺國家隊層面搵一位咁講戰術嘅教練,似乎對球員執行上同教練領導上都唔係易事。

未放棄契仔巴神

節目入面文仙尼都有提到佢昔日愛將,家吓已經淪落到踢意乙嘅「巴神」巴洛迪利。文仙尼就指巴神仍然係意大利入面技術最好、天賦最高嘅前鋒,仲話國家隊嘅大門依舊為佢而開,「巴洛迪利依然係國內技術最好嘅前鋒,國家隊大門為所有人開,雖然近幾年係麻麻地,但佢只係30歲,都仲後生。」

雖然文仙尼仍然對巴洛迪利愛護有加,但係巴神喺上年12月加盟蒙沙後,至今只係踢咗1場波上陣62分鐘咁大把,其他時間都係養傷,似乎要返國家隊難度真係超大。

包羅萬有,「體」得舒服,即Like「蘋果體育」FB專頁!
BannerBanner