求驗客手記:巴塞過「蘭」關美斯又傳入「門」

更新時間 (HKT): 2021.02.05 02:00

巴塞隆拿周三喺西班牙盃八強作客CF格蘭納達,先失2球下加時後反勝5:3,晉身四強。格蘭納達今戰先領先2:0,巴塞要到88分鐘先由基沙文追番一球,再喺補時助攻佐迪艾巴射入追成2:2,將比賽帶入加時。加時兩隊繼續駁火,最後基沙文同艾巴各入一粒,加埋法蘭基迪莊嘅入波,以5:3反勝格蘭納達。巴塞全場射門36次有20次中目標,係自13/14球季以來,各項賽事單場射門次數最多嘅一仗。至於今場冇波入嘅美斯(圖)去留問題就繼續發酵,今次仲激親教練朗奴高文。事源巴黎聖日耳門(PSG)阿根廷球星迪馬利亞周三幫球隊炒完尼姆3:0後,公開話季後約滿巴塞隆拿嘅阿根廷隊友美斯極大機會加盟PSG,激到巴塞主帥朗奴高文大鬧離譜,話PSG喺美斯嘅話題上講得太多:「PSG對一位仍然效力緊巴塞嘅球員講三講四,我認為係對我哋唔尊重,而且未來兩隊將會喺歐聯碰頭,美斯仍然係巴塞一員,會喺兩回合淘汰賽中對付佢哋。」

包羅萬有,「體」得舒服,即Like「蘋果體育」FB專頁!
BannerBanner