Goal富帥:國際玩輪換難讓費倫

更新時間 (HKT): 2021.02.05 02:00

意大利呢期賽程忙到甩碌,周中先踢完意盃四強首回合嘅球隊,今周繼續要應付聯賽,下周中又要踢次回合比賽,輪換呢個因素一定唔可以睇少。周中就貼中祖雲達斯首回合贏國際米蘭,照舊引用番盃賽兩隊嘅狀態同實力,去推介之後嘅意甲。

周中輸波嘅國際米蘭,星期五就會作客先鬥費倫天拿,真係非常蝕底。其實2隊意盃16強都交過手,「紫百合」法定時間和1:1,加時先輸畀國際,今次返到聯賽,睇見對手打到殘,一定有仇報仇啦。無疑實力上始終國際會較好,但考慮已經硬拼咗祖記,仲要贏勢輸波,教練干地都想拎番個盃保住帥位,下星期次回合就一定要再搏,陰謀論睇國際會有輪換政策,暫時海外亞洲盤國際讓到一球真係好過份,一定唔睇好,要揀就揀紫百合,不過補多注入球「大」,始終費倫天拿防線都幾豆腐,最終國際贏2:1都仲有得執!

星期六祖雲達斯就會主場對羅馬,日子上仲要比國際少一日備戰次回合,睇嚟輪換機會比國際更大,預計祖記會先求守,入球數字覺得唔會多,重心推介「細」。勝負方面,羅馬作客嘅戰績始終麻麻,祖記主場威力較強,亞洲盤雖然讓到半/一,主隊仲信得過,始終四隊喺聯賽榜都咬得好緊,主場出擊不容有失,另外都可以補番上半場主W,祖記可能上半場已經全力搶攻盡快控制戰局,首循環作客都半場領先羅馬,下半場先俾對手追和。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner