求驗客手記:阿蘇破C朗「處子」紀錄

更新時間 (HKT): 2021.02.10 02:00

西甲一哥馬德里體育會禮拜一主場對切爾達,賽前證實湯馬士林馬同赫達靴里拉又中武肺,係馬體會1周內第6單確診,好在佢哋仲有狀態大勇嘅蘇亞雷斯(中)梅開二度,開季17場入咗16球,超越咗基斯坦奴朗拿度(C朗),成為咗21世紀喺西甲處子球季開局入波最多嘅球員。當年C朗喺09/10球季加盟皇家馬德里後,開季17場入成15球,都冇家陣34歲嘅阿蘇咁威,可惜嘅係馬體會完場前一分鐘失守,最終俾對手逼和2:2完場。不過痛失兩分嘅馬體會,喺西甲仲領先緊阿蘇嘅舊東家巴塞隆拿多達8分仲要踢少1場。據統計阿蘇今季入咗嘅16球,足足幫馬體會拎多12分,外媒就鬧爆巴塞上年夏天踢走阿蘇嘅決定,就好似親手向爭標對手送上最昂貴嘅禮物,比起當年踢走馬勒當拿更加蠢,隨時要賠上今屆西甲冠軍㖭!

包羅萬有,「體」得舒服,即Like「蘋果體育」FB專頁!
BannerBanner