求驗客手記:豆腐防線失五粒出局 
熱刺等俾曼城開年

更新時間 (HKT): 2021.02.12 02:00

禮拜三係鼠年嘅尾二嗰日,2隊英超Big 6球隊熱刺同曼城齊齊出戰英足盃第5圈,可惜就同人唔同命,熱刺作客鬥同級嘅愛華頓,雖然為球迷上演一場入球騷,可惜鬥到加時都係輸4:5出局;另邊廂嘅曼城就繼續風騷,作客英冠史雲斯輕鬆贏3:1晉級8強,各項賽事連勝15場。兩隊嚟緊年初二會交手,睇怕哥迪奧拿帶領嘅藍月食完「天鵝肉」後,仲想食埋熱刺嘅豆腐防線同佢哋開年!

加時4:5負拖肥

熱刺今場開波3分鐘已靠達雲臣山齊士頂成1:0,但之後防線不斷犯錯,畀卡維特利雲、李察利臣同基菲爾施古臣幫愛華頓反超前3:1,但上半場尾段拉美拿再幫熱刺追近2:3。57分鐘,熱刺有達雲臣山齊士梅開二度追成3:3平手,點知68分鐘輪到李察利臣起孖,幫「拖肥」再領先4:3。尾段熱刺領隊摩連奴換入哈利卡尼,呢位英軍前鋒不負眾望,喺83分鐘幫球隊追成4:4,兩隊要踢到入加時,但最終愛華頓就靠班納特安尼斯奧喺加時入波,最終以5:4淘汰熱刺。今場一共產生咗九個入波,係自1961年以嚟英格蘭頂級聯賽球隊互撼嘅英足盃當中,入波最多嘅一場,相信球迷都睇得好過癮。

不過輸波嘅摩佬就同球迷有唔同睇法,事關喺佢領軍生涯21年入面,今場只係第6次畀對手單場攻入4球或以上(見附表),以調校防守見稱嘅摩佬,望到熱刺咁嘅豆腐防線當然唔滿意:「靠進攻足球贏波嘅大前提,係你犯嘅錯唔可以多過你創造嘅機會,所以今場入四球都仲係唔夠。入波之後球隊就失誤、失誤同失誤,然後先再入波、入波再入波。」

對比起嬲爆嘅摩佬,另一名戰術大師愛華頓領隊安察洛堤就淡定得多,話晒佢經歷過伊斯坦堡之夜,有乜風浪未見過,所以當班納特射入奠勝球、全隊上下興奮慶祝嗰陣,肥安就俾鏡頭影到喺到嘆咖啡,真有大師風範。

曼城15連勝破紀錄

同日曼城就派出強陣出征史雲斯,結果憑基爾獲加、史達寧同加比爾捷西斯各入一球,以3:1輕取史雲斯收穫各項賽事15連勝,打破咗英格蘭頂級聯賽球隊嘅最長連勝紀錄外,今場亦係領隊哥迪奧拿執教268場比賽以嚟嘅200場勝仗,咁強勢嘅曼城年初二遇上豆腐防線嘅熱刺,相信哥帥都準備跟喺肥安後面排隊等食喇!

手機用戶請按此放大圖表

包羅萬有,「體」得舒服,即Like「蘋果體育」FB專頁!
BannerBanner