Goal富帥:新正頭跟實澳洲一對「西」

更新時間 (HKT): 2021.02.12 02:00

推咗幾次意大利波,新正頭同大家見面就轉吓口味,玩返澳洲波,始終踢咗幾輪之後,球員開始上力,而且邊隊好邊隊差,都有少少基本認識。過年好多人都會打吓牌發吓新年財,星期六年初二就同大家推介一對「西」:西悉尼流浪者同西部聯。

先講西悉,西悉尼流浪者就主場對墨爾本城;呢排追西悉就真係冇死,已經六場未輸過,始終隊波又唔係咩名氣波,對弱隊讓得唔係多,對強隊又有得受讓,盤路都好精神。戰績穩定其中一個原因就係攻守平衡,7場只失6球,係澳職第二少,真係贏你唔到都唔使輸畀你先。上場對住墨爾本勝利,睇落靠尾段先入兩球贏波,好似有啲險,不過其實全場都開住主攻模式,圍住對手嚟打,入波都只係時間問題。

西悉星期六就對另一支墨爾本球隊,墨城名氣就夠晒響,又有同曼城同一集團嘅水喉射住,簽埋唔少有名氣球員。莊家咪開到佢哋熱晒嘅,但其實墨城已經連輸三場,表現比上季明顯飄忽好多,睇到教練都搵緊方法改善,到目前為止成效都唔大。不過始終墨城隊波夠響,初盤仲要讓平/半,或者平手盤,西悉保持到狀態,一定繼續追落去,另外墨城呢排防守麻麻,補埋個「大」都唔錯。

另一場就係星期六頭場,有我最愛嘅西部聯,今次佢哋就主場對FC悉尼。西部聯對住傳統勁旅一定當老虎咁打,上仗作客領先2:1下,輸畀中岸水手2:3,其實整體表現比對手好,只係尾段太大意掛住留力收起主力,今次對大老虎就一定認真好多。FC悉尼上季係威係勢,包辦兩個冠軍,不過踢完亞冠盃回國後,表現比上季有啲遜色,要讓平/半真係唔值,下盤再加上「大」,真係冇問題。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner