求驗客手記:得一次中框肉酸晉級 
車仔新年激嬲杜曹

更新時間 (HKT): 2021.02.13 02:00
■車仔靠譚美阿巴謙(藍衫)入波晉級,八強將對錫菲聯。美聯社

年三十晚英足盃踢埋最後2場第5圈賽事,其中新帥杜曹上任後未輸過嘅車路士作客鬥英冠嘅班士利,最後靠譚美阿巴謙下半場一箭定江山1:0小勝對手入8強。雖則杜曹嚟咗後車仔五場不敗,但今場控球率贏晒都係得一腳射門中框,實在講唔過。所以賽後呢位德國籍領隊都唔多收貨,大彈隊波唔夠勇敢,進攻上未交足貨。

今屆英足盃車路士籤運認真唔錯,連續三圈都係對低組別球隊,今場作客鬥英冠中游嘅班士利杜曹又輪換,到盃賽畀全球最貴門將阿列沙巴拿加擔正,多少希望佢可以畀啲壓力艾度亞文迪,後者喺今季加盟後幾乎場場英超都踢足。藍戰士今場波雖然有73%控球率,不過射門就輸晒得六次,係主隊14次一半都冇。全場唯一入球就喺64分鐘,前鋒阿巴謙門前接應列斯占士傳中快腳射入,呢腳亦係車仔全場唯一嘅一腳中框射門,最終阿巴謙繼上輪「戴帽」後今輪又做功臣,帶領車仔打入八強。

1:0做低班士利唔夠勇

睇返場波,其實車仔唔使輸都認真有運,事關上半場成班真係好似撻唔着,好彩下半場杜曹改踢四後衞,加埋換咗交助攻嘅占士出嚟先扭轉局面,不過入咗波後又無以為繼。難怪杜曹贏波後唔多滿意,話隊波踢嚟完全冇節奏而且怕失波唔多勇敢:「下半場有啲調動令到表現好咗,但入波後又謝晒,因為我哋感覺到對方谷晒上嚟,所以刻意返後。大家都唔夠勇,冇晒節奏同自信,咁樣面對不顧一切進攻嘅球隊實在危險,隊波理應可以踢好啲。」

曼市雙雄八強惡打

雖然杜曹唔多滿意車仔表現,但點講都好都係晉級,而同日近況極差嘅修咸頓竟然反底2:0擊敗狼隊,終止近期四連敗頹勢,亦令英足盃八強全數誕生。車路士就抽中英超包尾嘅錫菲聯,兩隊啱啱都喺聯賽打完,車路士都係僅贏2:1,所以杜曹講明一定會難打。兩支曼徹斯特球隊都抽中硬嘢,曼城要作客鬥啱啱淘汰咗熱刺嘅愛華頓;曼聯就同樣要作客鬥喺聯賽榜力追緊佢哋嘅李斯特城,2隊波分別排聯賽嘅2、3位,家陣由聯賽鬥到英足盃,勢必係下輪最矚目對碰。8強賽事就會喺下月20同21日上演,又睇吓到時邊隊打入四強。

包羅萬有,「體」得舒服,即Like「蘋果體育」FB專頁!
BannerBanner