【一燈決】燈神:米蘭越踢越有上盤穩開

更新時間 (HKT): 2021.02.13 02:00

【名家足路】

【對決場次︰史柏斯亞vsAC米蘭】

今日年初二,香港人經歷過去一年出街戴口罩、晚巿冇堂食、打波冇場地嘅一年,你話點會冇抗疫疲勞?新一年疫情見唔見到曙光未知,但路點都要行,好在賭波賭馬冇停過,叫做有啲娛樂,新一年喺度祝大家牛來運到,事事順利,身體健康。

上周《一燈決》盧卡東尼贏得清脆,弗賴堡贏盤之餘仲贏埋波,多蒙特上盤抵輸。今周我揀咗場意甲挑戰一哥,榜首AC米蘭作客下游史柏斯亞,今次又睇吓東尼兄嘅主場受讓博得過理論,會唔會令我輸畀同一個人twice。

今屆意甲鬥得精采,過去連贏九屆冠軍嘅祖雲達斯季初脫腳接連失分,適逢米蘭雙雄冒起,呢個三頭馬車格局睇怕都要鬥到最尾。米蘭目前以兩分領先國際,關鍵在於球隊作客戰績特佳,今季10次聯賽作客取得9勝1和不敗戰績,成績冠絕意甲,而且每場波都入兩球或以上,咁嘅表現對住意甲主場成績最差嘅史柏斯亞,讓一球嘅上盤應該穩開。

米蘭2019年10月揾咗皮奧利掌帥,上季季中搵番伊巴謙莫域回巢,踢咗半季見對辦就再同佢續約一年,暫時更以14球成為米蘭首席射手。皮奧利亦考慮到伊巴畢竟已經30有9,所以佢又喺上月轉會窗簽咗另一老將文迪蘇傑,6、70分鐘入替伊巴就啱晒。以米蘭今季越踢越有嘅走勢,都幾睇好佢哋攞意甲冠軍,米蘭對上一次贏意甲冠軍已經係10年前,巧合嘅係,當年伊巴咁啱由巴塞外借加盟,紅黑fans係咪要買定香檳呢。

文:筋肉人

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner