趣趣地:賓福特開賽前唔再跪

更新時間 (HKT): 2021.02.15 02:00

英冠球會賓福特(圖)上禮拜六宣佈,由聯賽主場對班士利起,球員喺開賽前唔會再單膝下跪,因為佢哋認為咁樣根本宣傳唔到種族平權。球會喺聲明度話:「呢個係經長時間討論後,集體作出嘅決定。我哋由上年6月開始,喺比賽前單膝下跪,但同其他球會嘅球員一樣,我哋唔再相信咁樣仲有影響力。」事實上,上年9月昆士柏流浪球員就已經拒絕過單膝下跪,本身係黑人嘅昆士柏流浪高層費迪南仲批評:「單膝下跪已經成為咗『公關』行為,失去咗種族平權嘅訊息。」而效力英超水晶宮嘅球星韋費特沙夏亦都曾經喺節目度話,單膝下跪嘅行為好瘀,亦唔理解點解單膝下跪,就表達到球員係在乎同支持種族平權。

包羅萬有,「體」得舒服,即Like「蘋果體育」FB專頁!
BannerBanner