Goal富帥:祖記咁曳梗係要波圖

更新時間 (HKT): 2021.02.16 02:00

小弟終於升級可以講吓歐聯,事關疫情關係,澳職啲賽程亂晒龍,好似上個星期俾「雙西」大家,結果都取消晒;小弟今個星期都有份講一場歐聯,所以都做足功課俾心水大家,等各位讀者可以發個新年財。

小弟星期三會講波圖(圖)主場對祖雲達斯呢場波,先講主隊波圖先,喺呢場歐聯16強首回合之前,波圖好明顯喺聯賽同盃賽上都有少少留力,聯賽今年俾士砵亭拋離,好彩其他對手水準都唔高,二哥位置都算穩陣;波圖喺歐聯分組賽出嚟嘅戰績都唔太差,三場主場未輸過,連曼城都只能夠作客摸和波圖,今次到祖雲達斯作客,信心都唔太大。

祖記近況直頭係曳,聯賽表現非常唔穩定,上輪仲輸俾拿玻里。兩回合淘汰賽事,主隊要拎住好戰果對出線好重要,所以波圖呢場波一定盡力搶。相反祖記呢場波反擊機會亦未必多,始終以基斯坦奴朗拿度掛帥嘅反擊,𠵱家嚟講速度未必特別快,所以衡量兩隊互攻下,波圖會較優勝,仲要有得受讓平/半,所以揀波圖非常正路。

喺疫情下,「入球大細」成日會反常,人人會估「細」嘅波,就會開「大」,呢場大家偏向買「細」,我就會買「大」,如果堅持要買「細」,就考慮「半場細」。

同日另一場嘅西維爾主場對多蒙特,兩隊喺聯賽上都尚算穩定,但以西維爾進步比較大,多蒙特叫做狀態上有啲下滑,兩隊入球數字都非常高,所以首選「大」。以往德國波就食住西班牙波,但今次西維爾主場,加上近期嘅進步,平手盤點都係要返主隊。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner