趣趣地:李天秀夠坦白︰02明踢馬甸尼

更新時間 (HKT): 2021.02.20 02:00

2002年世界盃南韓殺入4強,但過程中都不乏有球證幫手,最經典莫過於對意大利嘅16強。而近排當年有份代表南韓出戰嘅前國腳李天秀上一個綜藝節目時,就大爆自己踢意大利隊長馬甸尼後腦嘅「裂頭腳」係專登,係為咗報對方睇佢哋唔起嘅仇。

當年16強一戰,記性好嘅球迷都記得相當之「黑」,其中有一腳李天秀入楔想埋門,當時馬甸尼就跟上防守,之後仲跌咗落地下,當時李天秀就博懵一腳踢落馬甸尼個後腦,不過「假」到出晒名嘅球證摩蘭奴就冇任何表示。

喺綜藝節目上面,呢位曾經踢過皇家蘇斯達嘅翼鋒就話自己嗰腳係特登,就話因為意大利球員好寸先會咁,「嗰啲意大利球員好寸,完全目中冇人,我覺得佢哋睇唔起南韓球員,而且都有南韓球員被佢地踢過,所以我先咁做。」李天秀就話自己唔係突登揀馬甸尼嚟踢,但咁啱有咁嘅機會所以就出腳。

其實呢次都唔係李天秀第一次講呢件事,佢以前喺自傳都分享過,睇嚟佢到家陣仲係覺得踢呢一腳係成就,真係難怪咁多人過左咁耐都仲係咁憎南韓。

包羅萬有,「體」得舒服,即Like「蘋果體育」FB專頁!
BannerBanner