【一燈決】燈神:蝙蝠軍夠活力上盤必達

更新時間 (HKT): 2021.02.20 02:00

【名家足路】

【對決場次︰華倫西亞vs切爾達】

上周《一燈決》推介AC米蘭上盤,點知爆冷0:2輸畀下游史柏斯亞,聯賽榜首交咗比同巿死敵,同事圍內賭波group有人讚盧卡東尼夠眼光,佢呢份心意,我收到晒喎。德甲唔夠玩,意甲又輸,今個月第三期試吓轉玩西甲,盧卡東尼揀咗場實力好接近嘅華倫西亞主場對切爾達,主隊少讓平/半,今次我繼續揀上盤。

華倫西亞屬西甲傳統勁旅,記得我入行冇耐,呢隊由賓尼迪斯帶領、陣中有簡尼沙利斯、艾耶拉、「小丑」艾馬嘅「蝙蝠兵團」,居然可以力壓巴塞隆拿同有六條煙嘅皇家馬德里,贏到兩次西甲冠軍;不過自從肥賓過檔利物浦,「華倫」變咗「沉淪」,今季仲跌出前半版。

華倫沉咗十幾年,其實同佢管理層以及財政狀況有關,當陣中有球星冒起,管理層好快將佢哋出售套現,韋拿、大衛施華、桑馬達、艾斯高嫁入豪門前,全部都做過蝙蝠仔,今季就有射手洛迪高摩連奴去咗列斯聯,同埋費倫托利斯轉投曼城,球會為咗錢賣仔無可厚非,但季初免費放走都仲算當打嘅柏利祖去維拉利爾,真係唔明智。

講到華倫咁多缺點又點解推介?一來佢主場唔差,今季只輸過三場,仲試過4:1贏皇馬;二來以老帶新嘅打法算係有活力,隊長荷西加耶同前阿仙奴中堅基比爾包列斯達穩住防線,中前場由一班廿歲出頭嘅球員打突擊,好似葡萄牙國腳干卡路古亞迪斯、前西班牙U21代表卡路士蘇拿,仲有啱啱噚日20歲生日嘅南韓國腳李康仁,對住2021年至今只贏過一隊艾爾切嘅切爾達,華倫可睇高一線。

文:筋肉人

《一燈決》係今季新欄目,由上月擂台盟主同上月燈神拗吓頸,睇吓讀者信邊個。

包羅萬有,「體」得舒服,即Like「蘋果體育」FB專頁!
BannerBanner