Goal富帥:繼續追阿特蘭「大」

更新時間 (HKT): 2021.02.23 02:00

周中同大家講歐聯16強首回合,一來有我熟悉嘅意甲球隊,二來小弟聽晚仲會評述拉素對住拜仁慕尼黑呢場波。今仗對拉素嚟講非常重要,因為遇上上屆冠軍,對手又近況平平,打落水狗機會真係百年難得一遇嘅,我信拉素全體上下都會好好把握今次機會。

拉素喺意甲上半季只叫做平平穩穩,頭三去唔到,護級又唔使預佢,目標放喺歐聯都好正路,小組賽未嘗一敗晉級夠晒證明;近期主場個勢勁,連埋盃賽七連勝,喺主場受讓去到半/一,真係想講一句:「憑甚麼,拜仁」。拜仁世冠盃返嚟之後,舟車勞頓搞到跌晒watt,第1場和比勒費爾德3:3,仲可以賴大風雪,上次作客算唔上一線兵嘅法蘭克福,仲要1:2輸埋,以呢個走勢作客去到羅馬仲要讓波,奉勸一句祝你好運!

星期三就講我愛隊阿特蘭大(圖),佢哋主場對住皇家馬德里,皇馬壞消息不斷,隊長沙治奧拉莫斯受傷,仲好大可能下季走人,不過聯賽仲反而有返起色,由落後馬體會10幾分,到家陣只落後三分,不過就打多一場。呢場歐聯嘅關鍵,就係取決於教練施丹點用人,如果施丹派出一班水貨球員,明顯就係佢將會放棄歐聯專心本土聯賽賽事,皇馬家陣平手高水,非常古怪。阿特蘭大主場攻力唔使講,啱啱喺意甲對拿玻里,你來我往你一拳我一腳,最終4:2贏拿玻里,所以呢場歐聯重心推介就係入球「大」,勝負就睇定啲,決定權係皇馬出行貨定水貨陣容。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner