Goal富帥:信日職「升班馬」揭幕搶「分」

更新時間 (HKT): 2021.02.26 02:00

日本職業聯賽又返嚟啦,上星期同大家講日超盃,川崎前鋒話就話險勝,不過就大把喺手,今季都要繼續追,不過揭幕戰就硬拼橫濱水手,讓半/一都幾深,暫時觀望住,今次就同大家介紹兩場關於升班球隊嘅賽事。

先講上季日乙冠軍德島漩渦,攻入67球波拎到冠軍,雖然同亞軍福岡黃蜂同分,但明顯分野就係攻力。我上季已經同大家講,日職同日乙分野唔係咁大,因為踢法上大家都好似,大部份都講控球、小組入楔,勝負分野真係視乎嗰日邊個把握力好唔好。德島升班第一戰就星期六,作客大分三神,從上季天皇盃準決賽對大阪飛腳睇,雖然係輸0:2,但其實攻勢比飛腳仲多,可以講德島實力同日職中游分子相若。始終今仗係「升班馬」身份,所以大分讓波係非常正路,但以我上季睇咗德島咁多比賽,受讓平/半一定冇問題,下盤加個「大」啦。

另一場下星期日,福岡黃蜂就主場對名古屋鯨魚,形勢就有啲唔同,上季鯨魚其實表現非常好,但因為球隊板凳深度不足,所以下半季出有下滑迹象。今季佢哋目標比上季更高,球隊亦現野心,甚至以聯賽冠軍為目標,無論外援及本土球員亦都有所增加。齋藤學、柿谷曜一朗加盟,上季入球能力不足問題都解決埋,相反福岡黃蜂喺本土球員上變動不大,三線實力都未見有太突出,所以傾向鯨魚讓得起半/一。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner