Goal富帥:逆思維博飛燕諾守掂AZ

更新時間 (HKT): 2021.02.26 02:00

周中推介兩場荷甲全中,始終歐聯呢啲大波,真係好睇唔好賭,拜仁輸到人怕就反底大勝,堂堂皇馬竟然受讓博你唔信,結果就波盤齊贏;所以繼續專攻二線聯賽好過。

荷甲兩支愛隊竟然下周日交手,阿爾克馬爾(AZ)主對飛燕諾;睇個走勢,AZ三連勝,周中又冇比賽,全面休息,被睇好真係好正常,世界博彩公司平均值,AZ主W就只有2.03倍,大約讓平/半中水,似乎都相當大信心。不過咁,今次就逆思維要番飛仔,始終AZ主場對強隊戰績麻麻,今季連埋盃賽兩次輸畀阿積士,對中游嘅格羅寧根亦輸波,聯賽主場11戰6勝2和3負,勝率以前列球隊嚟講唔算十分高。飛燕諾話就話周中作客格羅寧根悶和0:0,但單計聯賽更加已經四場不敗,今次有得受讓,就真係唔同講法。始終飛仔教練艾禾卡特,講進攻就真係唔叻,但講防守,荷蘭教練嚟講,佢都算係專家,所以今仗就推介番飛仔下盤。

其實呢個星期荷甲都幾多大戰,下星期日早段更加有榜首大戰,由第二位嘅燕豪芬,主場對榜首阿積士;燕豪芬(PSV)想後上過阿積士,呢場好關鍵。PSV上次反勝維迪斯3:1,最開心係見到馬里奧葛斯入兩粒,始終呢個德國天才,有番全盛期七成水準已經夠橫行荷甲,加上PSV仲有加普、當耶爾馬倫等射手,初盤見有得受讓平/半,大戰要下盤,真係定律嚟,今場就撐PSV。

文:Goal進

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner